اسلام آباد۔23جون (اے پی پی) اسپیکر قومی اسمبلی اسد قیصر پارت کرینے کہ وزارت داخلہ جانی خیل جھیڑہ نا ویل ءِ مذاکرات نا کمک اٹ ایسر کرفنگ کن تینا کڑد ءِ ادا کے۔ چارشنبے نادے آ قومی اسمبلی ٹی او زاہد اکرم خان درانی نا اعتراضی ٹک آ تینا رولنگ ءِ ترسا وزیراعظم ناسلاہکار پارلیمانی امور ءِ پارت کرے کہ جانی خیل ءِ وزارت داخلہ ءِ کنا کنڈآن داپارت کننگے کہ جانی خیل اٹ جھیڑہ ءِ توننگ کن مذاکرات نا کسر ءِ اختیار کننگے۔ وزیراعظم ناسلاہکار پارلیمانی امور ڈاکٹر بابر اعوان ایوان ءِ باوری کرفے کہ او کے پی کے آئی جی تون اوار ایلو تعلقدار کمامدارآتون ٹیل فون آ ہیت کرسا اسپیکر نا پارت آتے سرکیک۔ داکان مست جے یو آئی (ف) انا باسک زاہد اکرم درانی اعتراضی ٹک آ پارے کہ ای تدوک آ کیہی دے آن تینا حلقہ جانی خیل اٹ ہراجھیڑہ نا خطرہ نا ہیت ءِ کریٹہ داسہ او تصادم اس مسنے۔ پولیس ڈائریکٹ سم کاری کرے اوکان پد تصادم بناکرے و ہڑتوم آکنڈآتیان سم کاری مس و شیل خسنگا۔ داسہ حوال آک ءُ کہ اسہ بندغ اس زوال کرینے۔ اوپارے کہ پولیس والاک ہم ٹھپی ءُ و ننا تینا ءُ۔ اسپیکر دامعاملہ ءِ جوان وڑاٹ مذاکرات نا کمک اٹ ایسر کننگ کن تینا کڑد ءِ اداکے، اوفک برانز کن اسلام آباد آ بننگ ءُ۔
