اسلام آباد۔ 23جون (اے پی پی) وزیرخارجہ مخدوم شاہ محمود قریشی پارینے کہ ایف اے ٹی ایف نا بابت پاکستان تکنیکی گرج آتے پورو کرینے، پین گرے لسٹ اٹ تخنگ نا ہچ ءُ تک اس سلپک۔ چارشنبے نادے آ ایف اے ٹی ایف نا بابت تینا اسہ بیان اسے ٹی وزیرخارجہ پارے کہ ایف اے ٹی ایف اسہ ٹیکنیکل ءُ فورم اسے، ایف اے ٹی ایف نا بابت پاکستان تکنیکی گرج آتے پورو کرینے۔ شاہ محمود قریشی پارے کہ ننے 27ایکشن آئٹم تننگا ہرافتیان 26آ کاریم پورو مسنے وخت اس کہ بیست ءُ ہفت می ٹک آ پبی کاریم مسنے، داحالیت آتے ٹی پاکستان ءِ گرے لسٹ اٹ تخنگ نا ہچ ءُ تک اس پین سلپک۔ وزیرخارجہ پارے کہ اگہ پاکستان آ بیرہ زہم اس لڑیفنگ مقصود ءِ کہ تو داپین ہیت اسے۔ ہرنہ کہ پلیمری دیوان اٹی انت فیصلہ مریک۔ وزیرخارجہ پارے کہ بھارت دافورم ءِ سیاسی مسخت آتے کن کاریم اٹ اتنگ خواہک، بھارت ءِ دا فورم نا سیاسی کاریم اٹ اتنگ نا بایدے موکل تننگپ۔ شاہ محمود قریشی پارے کہ پاکستان ءِ پین گرے لسٹ اٹ تخنگ نامناسب مریک، پاکستان جہانی سلاہ و قومی فائدہ غاتے مون آ تخسا اہم ءُ فیصلہ کرے و ایلو ملک آتے پت اٹ ہلک وخت اس کہ وزیراعظم عمران خان تینا کہول آ چندی ملک آتا سرکڑدہ غاتون رابطہ کرے، ہراکانود جوڑ کننگ درکار اس اودے نن کرین۔ وزیرخارجہ پارے کہ پاکستان منی لانڈرنگ و دہشت گردی نا مالی کمکاری ءِ توننگ کن پبی گام گیج کرے۔ مخدوم شاہ محمود قریشی پارے کہ گرے لسٹ انا ٹیکی ننے میرات اٹ ملا، ننا حکومت نا بننگ آن مست پاکستان گرے لسٹ اٹ ہناسس، ولے نن پاکستان ءِ گرے لسٹ آن کشنگ کن ہروڑنا کوشست کرین۔ مخدوم شاہ محمود قریشی پارے کہ اینو دنیا امنا کننگ ءِ کہ داوڑنا پبی ءُ گام گیج، پاکستان اٹی مہالو اسہ حکومت اس ہم ہرفتنے۔ وزیرخارجہ پارے کہ کنا مون اٹی پاکستان ایکشن پلان آ پورو عملدرآمد کرینے، وزارت خارجہ تینا پیدوار موقف ءِ پیش کرینے و بھاز انگا ملک آک پاکستان نا موقف ءِ امنا ہم کرینو۔ وزیرخارجہ پارے کہ خوانہ پاکستان گرے لسٹ آن پیش تمسا وائٹ لسٹ اٹ برے۔
