اسلام آباد۔ 23جون (اے پی پی) بنجائی وزیر شاری ہوابازی غلام سرور خان پارینے کہ اخلاق نا سبخ تروک آ ک تینا دور حکومت اٹ سپریم کورٹ آ جلہو کرفیر، سیکورٹی ادارہ و جج آتے شست کریر، حقیقت اٹ دا بیرہ جنگ و جھیڑہ نا سیاست ءِ پہہ مریرہ، مچ آ دنیا ٹی کورونا نا حالیت آتا سوب ایوی ایشن نا بشخ ءِ 500ارب ڈالر نا نسخان رسینگانے، پنڈی و اسلام آباد نا شاری تے رنگ روڈ انا ڈٹ ءِ ضرور ایتنہ۔ چارشنبے نادے آ قومی اسمبلی ٹی شاری ہوابازی نا بنجائی وزیر غلام سرور خان شرہ ٹی بشخ ہلسا پارینے کہ 2018ء ٹی ہراتم دا ایوان جوڑ مس وعمران خان قائد ایوان گچین مس تو اونا اولیکو تران نا وخت آ ہلڑبازی، طعنہ و نعرہ بازی کننگا۔ اسہ گچین مروک ءُ وزیراعظم اسے سلیکٹڈ وزیراعظم پاننگا، اودے اولیکو تقریر ءِ کننگ کن ہلنگتو۔ اسیجائی دیوان تیٹی ہرمسٹ آ صدارتی تران تیا بدترین ہلڑبازی کننگا۔ صدر تو بنجاپاکستان و ریاست نا سروک مریک۔ وزیرخزانہ ءِ بجٹ تقریر کننگ کن ہلنگتو۔ اوپارے کہ دابجٹ تقریر آ انتس کہ پاننگا ننا کاٹم شرم آن شیف مس۔ اوپارے کہ ایوان اٹ پیش بروک آ واقعہ ٹی اِراحکومتی بنچ آتیان شرفمندآباسک آک ٹھپی مسر و دوبہ حکومتی بنچ آتیا خلنگ انگ ءِ۔ داغلط تاثر قائم کننگ نا کوشست کننگ انگءِ حالانکہ بد نظمی اپوزیشن بنچ آتیان کننگا۔ مستین اٹ دافک 1988ء ٹی گودی بے نظیر بھٹو ءِ سیکورٹی رسک گوندار و اونا برخلاف غلط زبان ءِ کاریم اٹ اتنگا۔ اوسپریم کورٹ آ جلہو کرفیر۔ سیکورٹی ادارہ و جج آتے شست کریر۔ داحقیقت اٹ جنگ و جھیڑہ نا سیاست ءِ پہہ مریرہ۔ داخرین ءُ ہیتءُ ہرافتے اوفک بایدے امنا کیر و تینا اصلاح ءِ کیر۔ اوپارے کہ کوویڈ نا حالیت و بے چیٹ حالیت آتیان پد ہم جوان ءُ بجٹ اس پیش کننگا۔ دنیا نا بھلا بھلا ایئرلائن تے کورونا نا حالیت آتے ٹی 500 ارب ڈالر نا نسخان مس۔ مخلوق ءِ نوکری تیان برطرف کننگا۔ ولے پاکستان اٹ داوڑ متو و نئے نن کس اسے نوکری آن کشان۔ مشکل آتیان پد ہم نن سرکاری ملازم آتا تنخواہ تیٹی دہ درسد ودکی کرین۔ زرگزران گچین مننگ ءِ دانا بھرمک الس اسکان سرمریرہ۔ اوفتا دورحکومت اٹ زرمبادلہ نا کوڑی 18ارب ڈالر آن کم مرسا 9ارب ڈالر اسکان بس، گردشی وامک ن انا دور اٹی ودار۔ اوفتا درآمد زیات و ایکسپورٹ کم ئس۔ نن ایکسپورٹ تون وابستہ صنعت آتے آسراتی تسن ہرانا سوب آن ایکسپورٹ 24ارب ڈالراسکان سرمسنے۔
