لاہور۔ 23جون (اے پی پی) صوبائی دارالحکومت نا علاقہ جوہر ٹاؤن اٹی واقع احسان ممتاز ہسپتال نا خڑک آ دھماکہ غان 10بندغ ٹھپی مسنو۔ ترجمان ریسکیو1122نا رداٹ دھماکہ داخہ در ترند ئس کہ خڑک انا ماڑی تا شیشہ غاک پنار،چندی گاڈی تے ہم نسخان رسینگا۔ واقعہ نا حوال آ ریسکیو ٹیم تے روانہ کننگا و دمدستی موقع غا سرمرسا کمکی کارروائی تا بناءِ کرینو۔ ترجمان نا رداٹ دھماکہ ہراوڑ مسنے دانا جاست وپاست برجاءِ۔ واقعہ نا حوال آ سی ٹی او لاہور منتظر مہدی ہم دمدستی وڑاٹ واقعہ نا جاگہ غا سرمس۔ ڈی سی لاہور مدثرریاض غٹ ہسپتال آتا ایمرجنسی ءِ الرٹ مننگ نا پارت ہم جاری کرے۔ ڈی سی لاہور مدثر ریاض جناح ہسپتال آ سرمس و دھماکہ ٹی ٹھپی مروک آتا جان پڑسی ءِ کرے۔ اودھماکہ ٹی ٹھپی مروک آتے گچین طبی امداد فراوان کننگ نا پارت کرے۔ وزیراعلیٰ پنجاب سردار عثمان بزدار ہم جوہرٹاؤن اٹی دھماکہ نا واقعہ نا نوٹس ءِ ہلسا انسپکٹر جنرل پولیس آن رپورٹ ءِ بٹنگا و واقعہ نا جاست وپاست نا پرمان کرے۔ وزیراعلیٰ پارے کہ دھماکہ نا زموار آتے دمدستی دزگیر کننگے، ٹھپی مروک آ بندغ آتے درمان نا گچین آسراتی فراوان کننگے و ٹھپی تا درمان کن غٹ ممکنہ گام گیج کننگے۔ وزیراعلیٰ عثمان بزدار ریسکیو 1122و کمکی سرجزآتون تعلقدار ادارہ غاتے کمکی سرجزآتے ترند کننگ نا پارت کرے و ایڈیشنل آئی جی، سی ٹی ڈی ءِ موقع غا سرمننگ نا پارت ہم جاری کرے۔
