اقوام متحدہ۔ 23جون (اے پی پی) مئی آن پد آن اوغانستان نا 370آن 50ضلع طالبان تا کنٹرول اٹی ہنانو۔ داہیت ءِ اوغانستان اٹی اقوام متحدہ نا امدادی مشن(یواین اے ایم اے)نا سروک ڈیبورالیونز سلامتی کونسل ءِ اوغانستان نا بارواٹ تینا تازہ انگا رپورٹ اٹی پارے۔ ڈیبورالیونز ہرااقوام متحدہ نا سیکرٹری جنرل نا خصوصی نمائندہ ہم ارے پارے کہ طالبان تینا کنٹرول ءِ پین علاقہ غاتسکان ودفنگ نا تیاری کننگ ءِ۔ اوپارے کہ گڑاس ضلع غاتیا طالبانک بیدس مزاحمت آن کنٹرول دوئی کریر و او صوبائی دارالحکومت آتا دامون ایمون واقع علاقہ غاتیا تیناچکار ءِ کرینو۔ اوپارے کہ داحالیت آتے ٹی سیاست، سلامتی، امن عمل و زرگزران نا بابت حالیت آک بے وڑ مننگ کیرہ۔ اوخبڑدار کرے کہ دامچ آ عمل نا جہانی کہول آ نتیجہ مرتب مریک و سلامتی کونسل ءِ داحالیت آتیان پورو آگاہی بایدے مرے۔ اواوغانستان آن درملکی فوج انا کشنگ نا فیصلہ ءِ اسہ زمی جمب اسے تون گنڈا ہرا اوغانستان نا حالیت آتے یکسر بدل کرسا ہلانے و امن عمل آ پیش رفت سست مسنے۔ دامچ آ عمل اٹ اوغان حکومت اٹ ہم سیاسی یکجہتی نا کمتی نظربننگ ءِ۔ اوداگڑتی نا درشانی ءِ کرے کہ اوغانستان اٹی بیدادی نا چرجوئی مرغن مننگ کیک تدوک آ بیست سال اٹی دوئی مروک آ سرسہبی تے دیر دننگ کیک۔ اوخبڑدار کرے کہ فوجی واک انا کمک اٹ اوغانستان اٹی جوڑ کروک آ اسہ حکومت اس ہم نئے بیرہی اوغان الس بلکن ڈیہہ نا ایلو ملک آتا است خواہی و موقف نا ہم برخلاف مریک۔ داڑتون اوار اوار اوغان الس ءِ خشک سالی، غذائی کاختی و مخلوق ءِ بے اُرا مننگ نا بھلا ویل ہم مون تروک ءِ۔ اوپارے کہ جہانی بینک انا اسہ جاچ اسے نا رداٹ کورونا دین و ہندا بڑزکو سوب آتا نتیجہ ٹی اوغانستان اٹی ڈیہہ نیزگاری آن شیف زندءِ تیرکروک آتا تناسب پنجا درسد آن ودسا ہفتاد درسد اسکان سرمننگ کیک۔ ولے جہانی برادری نا کنڈآن اوغانستان کن امداد نا اپیل نا ورندی ٹی داتم اسکان اسہ تہائی آن ہم کم امداد نا قول کننگانے۔ داڑتون اوار اوار بیدادی نا واقعہ غاتے ٹی لس شاری خاص وڑاٹ زالبول و چناتا مرک آتے ٹی ہم ترندی اٹ ودکی مسنے۔ اوخبڑدار کرے کہ اوغانستان نا حالیت آتے بدترین کہول آ سرمننگ آن توننگ کن بھاز کم وخت پین سلیسونے۔
