کراچی۔ 22جون (اے پی پی) وزیراعظم ناخصوصی کمکار سیاسی ابلاغ ڈاکٹر شہباز گل پارینے کہ احساس پروگرام آن ہلیس ایلو پروگرام تے ٹی سندھءِ بشخ ملانے، احساس کیش اٹ 32درسد سندھ انا الس ءِ تننگاوخت اس کہ آبادی نا لحاظ اٹ اونا بشخ 22درسد جوڑ مریک، بنجاداوار خراج زیات جمع کرینے، داوار بنجانا گچین کارکڑد انا سوب آن سندھ ءِ 844ارب ملا۔ ملک اٹ لٹ وپل انا سوب آن کبینی مس۔ 12ارب بیرہ سندھ حکومت الس ءِ سبسڈی تس، تدوک آ مالی سال اٹی سندھ حکومت خراج نا کساس ءِ 128ارب روپئی تخاسس ولے اوفک 105ارب جمع کریر وخت اس کہ نان خراج ریونیو50ارب سندھ ءِ جمع کروئی ئسک، دوئی 12ارب کننگا، پنجاب اٹی خراج ہدف آن زیات جمع کننگا، کے پی کے ٹی ہم خراج زیات جمع مس۔ داہیت ءِ او سے شنبے نادے آ داڑے گورنر ہاؤس اٹی اہم پریس کانفرنس آن تران کرساپارے۔ داوخت آ پاکستان تحریک انصاف نا مرکزی راہشون و قائد حزب اختلاف سندھ حلیم عادل شیخ، باسک سندھ اسمبلی فردوس شمیم نقوی و ایلوفک ہم ساڑی ئسر۔ ڈاکٹر شہباز گل پارے کہ بنجانا گچین کارکڑد نا سوب آن سندھ ءِ زیات بجٹ تننگا ہراڑآن سندھ انا ملازم آتا تنخواہ تے ودفنگانے۔ اوپارے کہ نن پاننگ خوانہ کہ ننا جماعت تینا حکومت اٹی انت انت کرے، سندھ اٹی کراچی آن ننے الس بھلو مینڈیٹ اس تسنے، ننا گچین مروک آ نمائندہ غاک جوابدہ ءُ۔ اوپارے کہ پنجاب اٹی 12پوسکن ءُ ہسپتال، 12یونیورسٹی جوڑ کننگ انگ ءِ، بنجاو پنجاب نا شونداری ءِ نن نشان ترسا کینہ، اینو سندھ آ ہیت کینہ۔ اوپارے کہ بلاول زرداری دوبہ خلکونے کہ بنجا خراج جمع کتنے، 18می ترمیم آن پد خراج نا رداٹ صوبہ غاتے بشخ ملک، تدوک آسال سندھ حکومت خراج 128ارب نا کساس تخاسس۔ ولے او 105ارب روپئی خراج جمع کرے، نان خراج ریونیو 50ارب سندھ ءِ جمع کروئی ئس، دوئی 12ارب کننگا، سندھ اٹی بروک آ سال انا ہدف 24ارب روپئی تخنگا۔ اوپارے کہ 155ارب نا سندھ اٹی شونداری اسکیم تننگاسس ہرافتیان بیرہ 100ارب خڑچ کننگا، 55ارب روپئی سندھ اٹی شونداری فنڈ انا ساڑی ءِ، سی ارب روپئی سندھ حکومت تون کیش زر ساڑی ئس ہراٹی پین ودکی مس و اوداوخت آ 65ارب مسنو۔ داکیش ءِ انت بینک اٹ تخانو؟ ہراکان کیش ملک۔ اوپارے کہ اگہ داخہ کیش ئسک تو الس آ انت اکن خڑچ کتور، ہڑی آ کچک نا ویکسین انت اکن ہلتور؟ اوپارے کہ سندھ انا الس ننے مینڈیٹ تسنے نن الس ءِ پانہ کہ سندھ حکومت انت کننگ ءِ۔
