حضرو۔ 22جون (اے پی پی) وزیراعظم پاکستان نا خصوصی کمکار موسمیاتی بدلی ملک امین اسلم پارینے کہ الس ءِ بنداوی آسراتی تا فراوانی حکومت نا اولیت ءِ۔ اوداخیال آتا درشانی ءِ حاجی شاہ خلق اٹ واٹر فلٹریشن پلانٹ نا بناءِ کرسا کرے ہراڑآ 60لکھ روپئی خڑچ بس۔ داوخت آ تران کرسا ملک امین اسلم پارے کہ اوہموشونداری کاریم تیا چکار کننگ ءِ ہراچین تا زند ءِ جوڑ کننگ کن کمکار مریر۔ مچ آ ضلع ٹی پاکستان تحریک انصاف نا گچین مروک آ نمائندہ و ٹکٹ ہولڈر آک شونداری کاریم تا جال اس تالان کرینو و اوفتا بھرم الس اسکان سرمننگ ءِ۔ داکان بیدس تعلیمی شونداری کن ہم کاریم برجاءِ ضلع اٹک اٹ پوسکن ءُ کالج و یونیورسٹی ہم جوڑ کننگ انگ ءِ ہراڑآن تعلیمی انقلاب بریک۔ دا غٹ ڈٹ آتا بناءِ بھاز زوت وزیراعلیٰ پنجاب عثمان بزدار کیک۔ اوپارے کہ الس وزیراعظم پاکستان عمران خان نا متحرک کماشی آ یخین تخر ملک انا زرگزرانی ٹک آک سہی کنڈآٹی ءُ ہراڑآن زرگزرانی انقلاب بریک و السی ویل آک ایسرمریرہ۔ ضلع اٹک اٹ شونداری کاریم تے زوت آن زوت پورو کننگک تانکہ الس اوفتیان فائدہ ہرفنگ کے۔
