اسلام آباد۔ 22جون (اے پی پی) بنجائی وزیر حوالکاری و شینکاری چوہدری فواد حسین پارینے کہ تدوک آ حکومت آتا کنڈآن ہلوک آ وام تا مد اٹ نن سالانہ 2ہزار ارب روپئی پدی تننگ اُن، مستین نا حکومت آتا سوب آن ملکی کٹیا کم و خڑچ آک زیات ءُ، اپوزیشن سمندرپار پاکستانی تے وونٹ انا حق تننگ خواپک، 2023ء ٹی 1500ارب روپئی بجلی گھرتا مد اٹ تروئی مریک، بجلی نا پلانٹ خلسا چاگڑدی بدلی نا منفی اثرآتے گوجالنگا۔ سندھ اٹی 13سال برسراقتدار پیپلزپارٹی صوبہ ءِ بھس کرے، سندھ انا انفراسٹرکچر آ پیسہ خڑچ کننگتو۔ سندھ حکومت ءِ ہنوک آ پیسہ غاک پیشن نا ملک آتیا گدریفنگک۔ اپوزیشن تون اواری اٹ ویل آتا ایسری اس خوانہ، وزیراعظم عمران خان بروک آ پنچ سال ہم حکومت کیک، اگہ اپوزیشن ءِ بروک آ گچین کاری تیٹی دھاندلی نا گڑتی ارے تو او ترمیم مون آ اتے، حزب اختلاف گچین کاری اصلاحات آن تینے اسہ کنڈ کننگ ءِ، اپوزیشن نظام انصاف و گچین کاری اصلاحات آ بایدے ہیت وگپ کے، اپوزیشن جوان چائے او اخس وزیراعظم عمران خان آ تنقید کیک، ہموخس او الس اٹ مقبول مریک۔ داخیال آتا درشانی ءِ او سے شنبے نادے آ قومی اسمبلی نا بجٹ دیوان اٹی گپ وتران کرسا کرے۔ بنجائی وزیر حوالکاری چوہدری فواد حسین پارے کہ بجٹ اٹ ننے 5700ارب روپئی دوئی مننگ نا اومیت ءِ، تدوک آ سال 4600آن 4700ارب روپئی ریونیو دوئی مسوسس، داسال ننے 5700ارب روپئی ریونیو نا دوئی کننگ آن پد نسخان مسہ ہزار ارب روپئی نا مریک۔ اوپارے کہ 5700ارب روپئی آن 57درسد بشخ صوبہ غاتے کاہک۔ پدریسہ مسٹ میکو سال نن دفاع نا بجٹ اٹ ہمووڑ ودکی کپننگ اُن ہراوڑننا ہمسایہ کرے۔ ننے 2ہزار ارب روپئی آن زیات زر ہمو وام تا مد اٹ تروئی تمنگ ءِ۔ ہرافتے مسکوہی حکومت آک ہلکر۔ اوپارے کہ ننا کٹیا کم و خڑچ آک زیات ءُ۔ 1947ء آن ہلیس 2008ء اسکان پاکستان کل6ہزار ارب روپئی نا وام دوئی کریسس و دازرآن نن اسلام آباد شار ءِ جوڑ کرین، گوادر ءِ اسہ پوسکن ءُ مارکیٹ اس جوڑکرین، نیوی نا بیس جوڑ کرین، موٹروے جوڑکرین و پاکستان نا انفراسٹرکچر ءِ شون تسون۔ اوپارے کہ 2008ء آن پد آصف زرداری نا حکومت بس و وامک اناگت 6ہزار ارب روپئی آن ودنگ نا بناءِ کریر۔ بروک آ دہ سال اٹی داوامک 26ہزار ارب روپئی اسکان سرمسر۔ اسحاق ڈار زرگزران نا بیڑہ ءِ غرق کرے، ننے ہرسال اِراہزار ارب روپئی ہمووام تیا سود انا مد اٹ تروئی تمک ہرافتے پیپلزپارٹی و ن لیگ ہلکر۔ اوپارے کہ ن لیگ ساہیوال نا تہہ ٹی کولانا پلانٹ خلک وخت اس کہ ساہیوال اٹ کولامفک، کولااول کراچی آ بریک، ہموکان ریل انا کمک اٹ ساہیوال آ اتنگک۔ داڈٹ انا سوب آن چاگڑدنا ویل ودی مس، ن لیگ انا لگژری ڈٹ آتا سوب آن بجلی کمپنی تے 900ارب روپئی تروئی تمک۔ اوپارے کہ داوخت آ 30ہزار میگاواٹ بجلی جوڑ کننگ نا لائخی ارے ولے 24ہزار میگاواٹ آن زیات ترسیل کننگ کپنہ، دانا دیراس زموارءِ۔ اوپارے کہ چائے نن بجلی ءِ کاریم اٹ اتین یا اتپن ننے داادائیگی تے کروئی ءِ۔ 2023ء ٹی بجلی نا دا ڈٹ آتا سوب آن ننے 1500ارب روپئی تروئی تمک۔ اوپارے کہ 18می آئینی ترمیم آن پد وسیلہ غاتا بھلا بشخ صوبہ غاتے کاہک، گیس انا فراوانی، ہسپتال آتا حالیت آتے گچین کننگ، پولیس و اسکول آتا حالیت آتے گچین کننگ صوبہ غاتا زمواری ءِ، داوخت آکراچی و لاڑکانہ نا حالیت آک غٹ انامون آٹو، ہموجاگہ ناک پاننگ ءُ کہ ننے آسراتی ملپننگ ءِ۔، داسال انابجٹ اٹ کم و ود 700ارب آن 750ارب روپئی سندھ حکومت ءِ ملک، داکان مست 1600آن 1800ارب روپئی مراد علی شاہ نا انتظامیہ ءِ تننگا۔
