اسلام آباد۔ 22جون (اے پی پی) وزیراعظم عمران خان زالبول ءِ زیزاریفنگ نا غاوانا ازالہ ٹی ڈیوالئی کننگ آ ایف آئی اے نا تعلقدار آفیسر آتے دمدستی وڑاٹ معطل کننگ و زالبول ءِ زوت ریلیف فراوان کننگ نا پارت کرسا خبڑدار کرینے کہ شاری اسے نا غاوتیا ڈیوالئی کننگ نا موکل تفننگک۔ سے شنبے نادے آ پرائم منسٹر ڈلیوری یونٹ(پی ایم ڈی یو) سٹیزن پورٹل نا کنڈآن جاری بیان نا رداٹ وزیراعظم ءِ غاو ملاکہ زالبول زیزاریفنگ نا برخلاف سٹیزن پورٹل آ غاوتس ولے زالبول نا غاوانا ازالہ ٹی ڈیوالئی کننگا۔ وزیراعظم داڑآ ناراضگی نا درشانی ءِ کرسا سخت نوٹس ہلک و ڈی جی ایف آئی اے ءِ شفاف انکوائری نا غرض اٹ تعلقدار آفیسر آتے معطل کننگ نا پارت کرے۔ بیان نا رداٹ زالبول پاکستان سٹیزن پورٹل آ 5وار غاو نوشتہ کرے ولے ایف آئی اے نا آفیسرآک کارروائی کتور۔ وزیراعظم تعلقدار آفیسر آتا برخلاف غیرزموار آفیسر آتا برخلاف انکوائری کرسا سخت ایکشن نا پارت کرے۔ زالبول ہراسگی نا سوب آن یونیورسٹی آن نوکری ءِ ہلسا ایف آئی اے تون رابطہ کرے و ایف آئی اے آفیسر آتا بے کمکاری نا سوب آن زالبول مبینہ خودکشی نا کوشست کرے۔ 16دسمبر 2019آن 13جون 2021ء اسکان ایف آئی اے غاوءِ پدریسہ گوجالا۔ دُوارہ غاو ری اوپن مننگ آن پد ہم ایف آئی اے تینا زمواری ٹی ڈیوالئی کرے ہراڑآ زالبول تینا اَرے تون اوار ایف آئی اے نا برخلاف غاو اتسا وزیراعظم آفس آ سرمس۔ زالبول نا درخواست آ وزیراعظم آفس سخت کارروائی کرے و زالبول ءِ تعلقدار آفیسر آتا برخلاف سخت کارروائی نا باوری کرفے۔ وزیراعظم ڈلیوری یونٹ ڈی جی ایف آئی اے ءِ مراسلہ اس جاری کرسا پارت کرینے کہ دا معاملہ نا بڑزکو کہول آ جاست وپاست ءِ کرفسا تعلقدار آفیسر آتا برخلاف ضابطہ نا رداٹ کارروائی کننگے۔ شاری تا غاوتیا ڈیوالئی کننگ نا موکل تفننگک۔ انکوائری رپورٹ ءِ وزیراعظم ءِ 20جولائی 2021ء آ پیش کننگک۔
