اسلام آباد۔ 22جون (اے پی پی) وزیراعظم عمران خان پارینے کہ پاکستان اوغانستان اٹی امریکہ تون امن کن شریدار مننگ کن تیار ءِ ولے تینا گل زمین آ امریکی فوجی اڈہ غاتا موکل تفک، نن دادے سگپنہ، نن مہالو آن دانا بھلو نہاد اس تسونن، اوغانستان اٹی اسٹ اس ننا پسندیدہ اف، ہرہموحکومت تون کاریم کننگ کن تیار اُن ہرا دے اوغان الس نا پت دوئی مرے، ڈیہہ ٹی امن و شونداری کن اسہ پوسکن ءُ علاقائی میثاق اسے نا گرج ءِ۔ پنی آ امریکی جریدہ”واشنگٹن پوسٹ“ اٹی نوشتہ کروک تینا سرحال اٹی وزیراعظم عمران خان پارے کہ پاکستان اوغانستان اٹی امن کن امریکہ تون شریدار مننگ کن تیار ءِ ولے اوغانستان آن امریکی فوج انا پیش تمنگ آن پد نن پین تنازعہ غاتا خطرہ خواپنہ۔ اونوشتہ کرے کہ اگہ پاکستان اوغانستان اٹی بمب انا برسات کن امریکہ ءِ اڈہ تننگ آ راضی مریک ہرانا نتیجہ ٹی اوغان خانہ جنگی مریک تو دہشت گرد آک بدلہ ہلنگ کن دُوارہ پاکستان ءِ شست کیرہ۔ نن دادے سگنگ کپنہ۔ نن مہالوآن دانا بھاز بھلو قیمت اس تسونن۔ ہنداوڑاٹ اگہ امریکہ ہراکہ تاریخ اٹ غٹ آن زیات واکداری عسکری واک تخک، اوغانستان اٹی 20سال رہینگ انگ آن پد ہم جنگ ءِ کٹنگ کتو تو پاکستان اٹ اڈہ جوڑ کرسا امرکٹنگ کیک؟۔ وزیراعظم تینا سرحال اٹی نوشتہ کرے کہ اوغانستان ہربھلو وخت اسسکان مشکل آتا گواچی مسنے، ٹی ننا اسہ وڑنا فائدہ ءُ۔ نن خوانہ کہ ہموڑے تنازع نا سیاسی ایسر اس پیش تمے۔ سوگوی، اقتصادی شونداری مرے و دہشت گرد آتا ہچ ءُ پناہ گاہ اس مف۔ نن اوغانستان اٹی ہروڑنا عسکری واک انا اقتدار ءِ سنبھالنگ نا برخلاف اُن ہراڑآن پین خانہ جنگی ودی مریک انتئے کہ اسہ رڑاس مچ آ ملک اٹی سرسہبی دوئی کننگ کپک،و داکہ حکومت اسے نا سرسہبی کن طالبان تا شمولیت المی ءِ۔ وزیراعظم پارے کہ مستین اٹ پاکستان متحارب اوغان جماعت آتیان گچین کرسا غلطی کرے ولے نن داآزموندہ غان ہیل کرینن، ننا ہچ کس پسندیدہ اف و ہرہموحکومت تون اواری اٹ کاریم کینہ ہرادے اوغان الس نا پت دوئی مرے۔ تاریخ پک کیک کہ اوغانستان ءِ پیشن آن کنٹرول کننگ مفک۔ وزیراعظم پارے کہ پاکستان اوغانستان اٹی جنگ آتیان بھاز مشکل آتون مون تسنے، 70ہزار آن زیات پاکستانیک تینا جون تینا دوتے سلانو، امریکہ ننے 20ارب ڈالرنا امداد تس ولے پاکستانی زرگزران ءِ 150ارب ڈالر آن زیات نا نسخان ہرفوئی تما و پاکستان اٹ سیل و سوات و زرکاری بھاز بے وڑ زہمی مس۔ وزیراعظم پارے کہ امریکی کوشست آتا بشخ مننگ آن پد پاکستان نا شریدار مننگ نا سوب اودے شست کننگا و داحالیت آک تحریک طالبان پاکستان و ایلو گروپ آتا کنڈآن ننا ملک انا برخلاف دہشت گردی نا سوب جوڑ مس۔ امریکی ڈرون جلہو ہرافتا برخلاف ای خبڑدارکریسٹ، جنگ ءِ کٹنگ کتو ولے اونا سوب آن امریکی تیکن خار ودی مس و ہڑتوم آ ملک آتا برخلاف دہشت گرد گروپ آتا کچ اٹی ودکی مس۔ تینا سرحال اٹی وزیراعظم عمران خان پارے کہ سال تیان کنا دا استدلال مسنے کہ اوغانستان اٹی ویل انا ہچ ءُ فوجی ایسری اس اف۔ امریکہ پاکستان آ اوغانستان تون ملحقہ نیم وتواجہ قبائلی علاقہ غاتے ٹی اولیکو وار فوجی دستہ گدریفنگ کن زور شاغا داغلط گمان آ کہ داڑآن شورش چٹک۔ داوڑ متو ولے داڑآن قبائلی علاقہ غاتے ٹی نیمہ آبادی ءِ ہمپوئی تما۔ بیرہ قطبی وزیرستان اٹی 10لکھ مخلوق ءِ ہجرت کروئی تما۔ ارب ڈالر نا نسخان مس۔ مچ آ خلق بھس مس۔ وزیراعظم پارے کہ جلہو آتے ٹی لس شاری تے مروک آ ”ضمنی نسخان“ پاکستانی فوج انا برخلاف خودکش جلہو آتا سوب مس۔ داجلہو آتے ٹی شہید مروک آ پاکستانی فوجی تا کچ اوغانستان و عراق ہڑتوم آ جاگہ غاتیا امریکی فوجی تا کچ آن ہم زیات ئس وخت اس کہ دانا نتیجہ ٹی ننا برخلاف دہشت گردی ٹی پین ودکی مس۔ بیرہ اسہ صوبہ خیبرپختونخواٹی 500پولیس کارندہ شہید مسر۔ سرحال اٹی وزیراعظم عمران خان پارے کہ پاکستان اٹی 30لکھ آن زیات اوغان باہوٹ ءُ۔ اگہ اوغانستان اٹی ویل انا سیاسی ایسر اس کشنگ نا جاگہ غا پین خانہ جنگی مس تو پین باہوٹ آک بریرہ و ننا سیمی علاقہ غاتے ٹی نزوری و نیزگاری ٹی ودکی مریک۔
