اسلام آباد۔ 22جون (اے پی پی) وزیرخارجہ مخدوم شاہ محمود قریشی بھارتی سرکار ءِ پاش آن پاش چیلنج ترسا پارینے کہ او مقبوضہ کشمیر اٹی چست کروک آ 5 اگست 2019ء نا اسہ کنڈی گام گیج آ، مچ آ دنیا ٹی رہینگوک آ کشمیری تا سلاہ ءِ ہلنگ کن ”آزادانہ ریفرنڈم“ اس کرفے۔ اوغانستان نا داخلی حالیت آک نازرک ءُ، ہموڑے ہچ ءُ رابطہ و سیوت اس نظر بفک، ڈاکٹر عبداللہ عبداللہ نا نکتہ نظر ءِ بننگ تون کنا فریشانی ٹی ودکی مس۔ سے شنبے نادے آ تینا اسہ بیان اسے ٹی وزیرخارجہ بھارتی سرکار ءِ مقبوضہ جموں و کشمیر اٹی 5اگست 2019ء نا گام گیج نا بابت ریفرنڈم نا چیلنج ترسا پارینے کہ داریفرنڈم اٹی اگہ مچ آ دنیا نا کشمیریک دا اسہ کنڈی گام گیج ءِ مسترد کیر تو ہندوستان ءِ تینا فیصلہ غاتیا نظرثانی کروئی مریک۔ ہندوستان نا خیال ئس کہ 5اگست 2019نا گام گیج آن اودے پذیرائی ملک وخت اس کہ نتیجہ غاک اوڑآن چپ پیش تمار، غٹ کشمیریک دا گام گیج آتا برخلاف یکجا مسر۔ہموکشمیریک ہرا تدوک آ دور اٹی بھارت سرکار تون اقتدار اٹ شریک ئسر اوفک ہم داگام گیج آتے مسترد کریر۔ شاہ محمود قریشی پارے کہ 24جون آ ہندوستان نا کنڈآن کانفرنس اس بٹنگ نا پڑو، داہیت انا کنڈآ اشارہ کیک کہ ”ہچ اس سہی اف“۔ اوغانستان نا بابت وزیر خارجہ پارے کہ داوخت آ اوغانستان نا حالیت آک نازرک ءُ، اسہ ہمسایہ اس مننگ نا خاطر ننا است خواہی ءِ کہ اوغانستان اٹی امن و سوگوی مرے، پاننگ انگ ءِ کہ اوغان صدر اشرف غنی تینا آرمی چیف، وزیر دفاع و وزیرداخلہ ءِ بد ل کرینے، داحالیت آتے ٹی دابدلیک داہیت انا اشارہ ایترہ کہ او تینٹ حالیت آتیان است جم خننگپک۔ شاہ محمود قریشی پارے کہ کنا ترکی ٹی اوغان بڑزکو کہولی مفاہمتی کونسل نا سروک ڈاکٹر عبداللہ عبداللہ تون اوڑدہی مس۔ اونانکتہ نظر ءِ بنگوٹ کنا فریشانی ٹی ودکی مس۔ وزیرخارجہ پارے کہ اوغانستان نا داخلی حالیت آک نازرک ءُ، ہموڑے ہچ ءُ رابطہ و سیوت اس نظر بفک، مذاکرات امر کروئی ءِ داڑآہم امنائی اف۔ وزیرخارجہ پارے کہ اوغانستان آن درملکی فوج انا 60درسد پیش تمنگ آن پد ہم اگہ طالبان آتون مذاکرات تعطل نا گواچی مریک تو داہیت گڑتی نا سوب ءِ۔ مخدوم شاہ محمود قریشی پارے کہ پاکستان، امن اٹ شریداری کن تیارءِ و تیار سلک۔ نن ہچ ءُ جھیڑہ سے ٹی بشخ ہلپنہ۔ نن امن نا کوشست آتے ٹی دنیاتون تفوک اُن۔ اوغانستان نا مفاہمتی عمل ءِ مون آ دننگ کن ہرممکن کڑد ادا کننگ اُن و کرسا کینہ۔ اوپارے کہ نن اوغانستان نا پوسکن تفنگ، اوغان باہوٹ آتا شرفمندی اٹ وطن آ پدی ہِننگ تون اوار غٹ سرحال آتیا ہیت و گپ کننگ کن تیار اُن ولے ہموڑے جنگ و جھیڑہ نا بشخ مننگ کپنہ۔ شاہ محمود قریشی پارے کہ دنیا ننے آن اومیت تخک ولے نن تینا فیصلہ غاتے تینا ملکی فائدہ غاتے مون آ تخسا کینہ۔
