اسلام آباد۔ 22جون (اے پی پی) بیلجیم اٹی کاریم کروک آ پاکستانی خواری کش آتا ترسیلات زر اٹی برجامالی سال انا اولیکو 11تُواٹی تدوک آ مالی سال انا ہندا مد انا مقابلہ ٹی 246.2درسد نا نمان ودکی ریکارڈ کننگانے۔ اسٹیٹ بینک انا کنڈآن دابابت جاری کروک حساب وکتاب نا رداٹ برجامالی سال انا اولیکو 11تُواٹی بیلجیم اٹی رہینگوک آ پاکستانی ورکرآک 226.1ملین ڈالر نا زرمبادلہ ملک آ مون تسر ہراتدوک آ سال انا ہندا مدانا مقابلہ ٹی 246.2درسد زیات ءُ۔ تدوک آ مالی سال انا ہندامداٹی بیلجیم اٹی کاریم کروک آ پاکستانی تا ترسیلات زر انا کچ 65.3ملین ڈالر ریکارڈ کننگاسس۔ مئی 2021ء ٹی بیلجیئم اٹی رہینگوک آ پاکستانی تا ترسیلات زرانا کچ 23.5ملین ڈالر ئس۔ تدوک آ سال مئی ٹی بیلجیئم اٹی کاریم کروک آ پاکستانی خواری کش آک 10.5ملین ڈالر نا زرمبادلہ ملک آ مون تسوسر۔ حکومت نا کنڈآن کانودی و بینکنگ ذریعہ اٹ ترسیلات زر انا است بڈی کن گام گیج و آسراتی تا سوب آن سمندرپار پاکستانی تا ترسیلات زر اٹی پدریسہ ودکی مننگ ءِ، برجامالی سال انا اولیکو 11تُواٹی سمندر پارپاکستانی تا ترسیلات زر اٹی تدوک آ مالی سال انا ہندا مدانا مقابلہ ٹی جم وڑاٹ 29.4درسد نا نمان ودکی مسنے۔ گمان ءِ کہ برجامالی سال انا ایسر آ سمندرپارپاکستانی تا ترسیلات زر انا کچ 29ارب ڈالر آن گدرینگک ہرااسہ پوسکن ءُ ریکارڈ اسے۔
