کوئٹہ۔ 22جون (اے پی پی) صوبائی وزیر داخلہ میر ضیاء اللہ لانگو و پارلیمانی سیکرٹری جان جوڑی ڈاکٹر ربابہ خان بلیدی ئسک پارینو کہ ڈاکٹر آتا پوسٹ مارٹم رپورٹ نار داٹ مسکوہی سینیٹر و پشتونخوامیپ انا صوبائی صدر عثمان کاکڑ آ بیدادی نا ہچ ءُ نشان اس ملتنے۔ بلوچستان حکومت عثمان خان کاکڑ نا خاہوت نا غم اٹی بریبرنا شریک ءِ، راستکی تے الس نا مون آ تخنگ خوانہ، پاکستان دشمن زموارآک اونا مرک آ سازش ودی کرسا منفی عزم تخرہ اگہ عثمان خان کاکڑ نا خاہوت حکومت تون رابطہ کرے تو صوبائی حکومت جاست وپاست اٹ اوفتے تون ہروڑاٹ کمک کیک۔ داہیت ءِ اوفک سے شنبے نادے آ سیکرٹری ہیلتھ کیئر اینڈ میڈیکل ایجوکیشن نورالحق بلوچ و پروفیسر ڈاکٹر نقیب اللہ اچکزئی تون اوار سول سیکرٹریٹ کوئٹہ ٹی پریس کانفرنس آن تران کرسا پاریر۔ صوبائی وزیر داخلہ میر ضیاء اللہ لانگو پارے کہ ایماندار عثمان خان کاکڑ عظیم ءُ سیاستدان و مدبر ءُ انسان اس ئس ہراڑتون کنتون اوار بھاز انگا سنگت آتا ذاتی تعلقداری ئس و زمانہ طالب علمی آن مظلوم قوم تا ترجمان ئس بطور سینیٹر بڑزکو ایوان اٹ بلوچستان ناالس نا حق انا ترجمان ئس و پشتون تیان بیدس مچ آ ملک انا محکوم قوم تیکن توار بڑزکرے۔ اوپارے کہ عثمان خان کاکڑ نا مرک آ ملک دشمن زموارآک غلط گمانی ودی کننگ خوارہ۔ صوبائی حکومت ایماندار نا خاہوت تون اولیکو دے آن رابطہ ٹی ئس و سی ایم ایچ کوئٹہ ٹی اونا درمان نا بست وبندآک پورو ئسر ہرافتا پشتونخوامیپ انا باسک صوبائی اسمبلی نصراللہ خان زیرے باضابطہ معائنہ ءِ ہم کرے ولے ولدا خاہوت و پارٹی نا راہشون تا مشورہ غان پد اودے پین درمان کن کراچی نا نجی ہسپتال بلوچستان حکومت تون ایئرایمبولینس مفننگ نا سوب آن پرائیویٹ ایئر ایمبولینس نا کمک اٹ گدریفنگا۔ پارلیمانی سیکرٹری جان جوڑی ڈاکٹر ربابہ خان بلیدی پارے کہ عثمان خان کاکڑ نا مرک مچ آ صوبہ نا مخلوق کن سانحہ اسے ایماندار اسہ نظریاتی ءُ انسان و بلوچستان نا نیزگار تپہ نا نمائندہ توار ئس۔ محکمہ جان جوڑی و ڈاکٹرآک عثمان خان کاکڑ نا درمان کن بست وبند آتے پورو کریسر ولے اونا خاہوت نا پاننگ آ کراچی آ گدریفنگا داسہ چونکہ ڈاکٹرآتا کنڈآن پوسٹ مارٹم رپورٹ بسنے ہنداخاطرآن منفی ہیت بایدے کننگپ نن عثمان خان کاکڑ نا خاہوت نا غم اٹی بریبرنا شریک اُن۔
