اسلام آباد۔ 21جون (اے پی پی) وزیرخارجہ مخدوم شاہ محمود قریشی پارینے کہ پاکستان اوغانستان اٹی امن عمل نا مخ تفی ءِ برجاتخک، امن کن دنیا تون کمکاری ءِ برجاتخسا نن امن نا کوشست آتے ٹی شریدار مرینہ۔ دوشنبے نادے آ دورہ ترکی و ڈیہہ نا حالیت آتا بابت بیان اٹی وزیر خارجہ پارے کہ اوغان عمل نازرک ءُ ریسہ سے ٹی پترینگانے۔ اوغانستان اٹی امن چندی ملک آتا اولیت ءِ۔ اوپارے کہ ترکی ٹی کنا اوغان ہم منصب حنیف اتمر تون اوڑدہی مس و اوغانستان اٹی ہڑتوم آ کنڈآتا تعلقداری و امن عمل نا بابت جوان گپ وتران مس۔ وزیرخارجہ پارے کہ اوغانستان نا بڑزکو کہول انا مفاہمتی کونسل نا چیئرمین ڈاکٹر عبداللہ عبداللہ تون ہم جوان ءُ نشست اس مس، اوغانستان نا تہہ نا حالیت آتا اندازہ مس و کنے پاکستان نا دوٹوک موقف ءِ پیش کننگ نا موقع ملا۔ انطالیہ سفارتی فورم نا بابت وزیرخارجہ پارے کہ انطالیہ ٹی چندی ملک آک وزیرخارجہ غاک ساڑی ئسر۔ اوڑدہی تے ٹی پاکستان نا نکتہ نظر ءِ پیش کننگ نا موقع ملا۔ شاہ محمود قریشی پارے کہ فلسطین نا تینا ہم منصب تون اوڑدہی ٹی فلسطین نا ویل آ سرجم گپ وتران مس۔ قطر وکویت نا وزیرخارجہ غاتون اوڑدہی تے ٹی دے ٹک نیامی نا حالیت آتیا ہیت مس۔ یمن نا حالیت، سعودی عرب تون مروک آ گپ وتران و پیش رفت آ گپ وتران کننگا۔ شاہ محمود قریشی پارے کہ پاکستان نا کڑد ءِ اینو مچ آ دنیا جوان انگا نظر اٹ ہُننگ ءِ۔ وزیرخارجہ پارے کہ یورپی یونین نا بڑزکو نمائندہ خارجہ امور تون ہم اہم ءُ اوڑدہی اس مس۔ اودورہ برسلز نا سلہ خلک، داکان بیدس یورپی یونین نا بڑزکو نمائندہ خارجہ امور وزیراعظم عمران خان ءِ دورہ برسلز نا سلہ خلکونے۔ وزیرخارجہ مقبوضہ کشمیر نا بابت پارے کہ میڈیا حوال آتا رداٹ مودی سرکار نا دیوان اٹی بھاز انگا گڑاتیا شرہ مریک۔ اوپارے کہ نریندر مودی نا دیوان ءِ بٹنگ بھلو پیش رفت اسے، غٹ کشمیریک 5اگست نا فیصلہ غان خوش الور، ولے داسہ گڑاس پاننگ وخت آن مست مریک۔ مخدوم شاہ محمود قریشی پارے کہ ترک صدر وزیراعظم عمران خان ءِ دورہ ترکی نا سلہ خلک۔ وزیراعظم عمران خان نا دورہ ترکی نا خدوخال تیار مننگ ءِ۔ وزیرخارجہ پارے کہ وزیراعظم عمران خان دوٹوک وڑاٹ پاکستان نا نکتہ نظر ءِ پیش کرینے۔ وزیراعظم پیدوار پارینے کہ امن کن دنیا تون کمکاری ءِ برجاتخنہ۔ شاہ محمود قریشی پارے کہ نن امن نا کوشست آتے ٹی پارٹنرمرینہ و اوغانستان اٹی امن کن تینا کوشست آتے برجاتخنہ۔
