اسلام آباد۔ 21جون (اے پی پی) وزیر مملکت حوالکاری وشینکاری فرخ حبیب پارینے کہ بلاول صاحب، بنجاسندھ حکومت ءِ داتم اسکان این ایف سی نا مد اٹ 1900ارب آن زیات تسنے، پاداپیسہ غاک ہراڑے خڑچ مسر؟ نی سندھ حکومت نا ڈیوالئی و لاپرواہی آ سندھ انا الس آن چوخت معافی خواہنگ اُس؟ سندھ انا الس پیپلزپارٹی ءِ ہرامینڈیٹ ءِ تس اودے پورو کننگ اٹ بھاز بے وڑ بے سہب مس، سندھ اٹی کرپشن تون لائخی نا کمتی ءِ، 59درسد شونداری بجٹ ءِ کاریم اٹ اتنگ متو، صوبائی حکومت ہدف نا رداٹ 53درسد کٹیا ہم جمع کرفنگ کتو اوکان پد ہم حکومت کننگ نا سوب آ بچک؟ پیپلزپارٹی نا گچین کاری نشان بایدے کرپشن مرے انتئے کہ او داڑآن بیدس ہچ اس کننگ نا قابل اف۔ دوشنبے نادے آ بلاول زرداری نا بیان آ ردعمل و تینا ٹویٹ اٹی وزیر مملکت فرخ حبیب پارے کہ بلاول ہمت کے و سندھ انا الس ءِ پائے بنجائی حکومت نا کنڈآن این ایف سی نا مد اٹ سندھ حکومت ءِ جاری مروک 1900ارب روپئی ءِ ہراڑے خڑچ کرینے؟ پیپلزپارٹی نا سندھ حکومت نابودی نا عالم ءِ کہ داسال انا شونداری بجٹ نا کم و ود 60درسد ءِ داسکان خڑچ کننگ کتنے۔ اوپارے کہ بلاول صاحب، پیپلزپارٹی تو کرپشن اٹ ماہر ئس ولے سند انا ہلک 14ارب نا خولم تے کنسا کیدار، داپارکہ خولم دُزی نا جاست و پاست ہراڑاسکان سرمس؟ انت اَل اس اعتراف جرم کرے یا معاملہ داخل دفترمس۔ اوپارے کہ سندھ اٹی تعلیم نا بشخ ہم آخیریکو ہڑکی کنسا نظربننگ ءِ۔ سندھ اٹی 50درسد اسکول آن پیشن ءُ، تھرانا مخلوق ساف دیر، بنداوی جان جوڑی و المی آسراتی تیان محروم ءُ، سندھ انا آخبت سٹنٹنگ گروتھ، انڈرایج و ایچ آئی وی ایڈزنا گواچی ءُ۔ اوپارے کہ سندھ اٹی حکومت پیپلزپارٹی نا ءِ ولے پوسکن آ گاج ڈیم، رینی کینال، سندھ بیراج، ملتان سکھرموٹروے، گرین لائن، نا فوربنجاجوڑ کننگ ءِ۔ وزیر مملکت فرخ حبیب پارے کہ عمران خان نا پامدار پالیسی و فیصلہ غاتیان ملک شونداری و الس شونہالی نا کنڈآ ہِننگ ءِ۔ اوپارے کہ جمہوریت کن شئیر خلوک آ بلاول پائے سندھ اٹی پبلک اکاؤنٹس کمیٹی تون اوار قائمہ کمیٹی تیٹی اپوزیشن نا اخس نمائندگی ءِ؟ میثاق جمہوریت ہراڑآ بے نظیر و نروک نواز شریف نا دستخط ءِ اوٹی پبلک اکاؤنٹس کمیٹی نا چیئرمین شپ اپوزیشن ءِ تننگ نا قول کننگا، پبلک اکاؤنٹس کمیٹی ٹی اپوزیشن نا نمائندگی مفننگ آن سندھ حکومت آ ہچ وڑنا چیک اینڈ بیلنس اس اف۔
