اسلام آباد۔ 21جون (اے پی پی) موسمیاتی بدلی نا وزیر مملکت زرتاج گل پارینے کہ وزیراعظم عمران خان نا وژن نا رداٹ ملکی تاریخ اٹی اولیکو وار موسمیاتی بدلی تون مون تننگ کن 14ارب روپئی آن زیات نا فنڈ جتا کننگانے، عمران خان وونٹ بینک و گچین کاری تیکن آخا بلکن بروک آ چین تیکن سجفک، ہرافتا لیڈرآک نریرہ لندن آ کارہ او اوورسیز پاکستانی تے وونٹ انا حق تننگ نا مخالفت ءِ کننگ ءُ۔ دوشنبے نادے آ قومی اسمبلی ٹی بجٹ آ شرہ ٹی بشخ ہلسا وزیر مملکت پارے کہ نن ہموپاکستان ءِ خنانن ہراتم پاننگاکہ کہ یا نن تون تفبو ورنہ ننا برخلاف مبو، نن ہموپاکستان ءِ ہم خنان کہ پاکستانی وزیراعظم امریکی عہدیدار آتون اوڑدہی کن چراٹی ئسرہ۔ نن ہمووزیراعظم ءِ ہم خنانن ہراامریکی تے پاریرہ کہ نم ڈرون جلہو کبو نن مذمت کرسا کینہ۔ کنے گمر ءِ کہ ای داوزیراعظم نا کابینہ ٹی اوار اُٹ ہرا9سال مست ڈرون جلہو آتا برخلاف وزیرستان اسکان مارچ کرے، کنے گمر ءِ کہ ای دا وزیراعظم تون تفنگ اُٹ ہرا پلوامہ جلہو آن پد پارے کہ جم جلہو کیرے تو نن تون لاالہ اللہ محمد رسول اللہ آن بیدس ہچ ءُ کسر اس مفک۔ کنے گمر ءِ کہ ہراتم درملکی خبررساں ادارہ نا اینکر حکومت آن اوغانستان اٹی جلہو آتے کن اڈہ تننگ نا سوج کیک تو وزیراعظم ساف انکار کیک۔ اوپارے کہ اینو اللہ نا فضل اٹ ہموپاکستان جوڑ مسنے ہرانا تغ ءِ نن 26سال مست پاکستانی تے نشان تسوسن۔ اینو ہراتم ای تینا حلقہ ٹی مخلوق تون ملیوہ تو اوپارہ کہ ننے پاکستانی مننگ آ گمر ءِ۔ اوپارے کہ بجٹ اٹ اسہ کروڑ نیزگار زالبول آتے کن 260ارب روپئی تخنگانے۔ داڑآن زالبول آتا حالیت اٹ گچینی بریک۔ پی ایس ڈی پی ءِ 900ارب روپئی اسکان ودفنگانے، اوٹی پسماندہ علاقہ غاتے اولیت تننگانے۔ بزغرآتے اولیکو وار بے سود وام تننگ انگ ءِ، کشت وکشار کن جم وڑٹ 53ارب روپئی تخنگانے ہراٹی 12ارب روپئی نا سبسڈی ہم اوار ءُ۔ بزغر شونہال مریک تو پاکستان شونہال مریک۔ زرتاج گل پارے کہ سرکاری ملازم آتا تنخواتیٹی دہ درسد ودکی کننگانے۔ کوویڈ۔ 19تون مون تننگ کن ویکسین نا فراوانی کن بجٹ اٹ فنڈ جتا کننگانے۔ وزیر مملکت پارے کہ موسمیاتی بدلی تیان پاکستان ءِ خطرہ مون تروک ءِ۔ پاکستان 3.8ارب ڈالر آن زیات نا نسخان ہرفینے و دابدلی تا سوب آن سالانہ اِراارب ڈالر نا نسخان مننگ ءِ۔ مستین اٹ جنگل آتا ڈغارتیا کوزہ مس و ہچ ءُ پالیسی اس جوڑ کننگتو۔ 2014-15ء ٹی موسمیاتی بدلی نا وزارت نا بجٹ بیرہ دونیم کروڑ روپئی ئس ہرا2016ء ٹی 2کروڑ 70لکھ مس۔ داہندن ءُ وزارت اس ئس ہراڑکن زیات فنڈ جتا کننگ نا گرج ئس۔ ساڑی بجٹ اٹ موسمیاتی بدلی تون مون تننگ کن 14ارب روپئی تخنگانے۔
