اسلام آباد۔ 21جون (اے پی پی) پنچ دے ئی پولیو تور مہم اٹی 33ملین آن زیات چناتے پولیو آن بچفنگ نا پڑی کنفنگا۔ ہندا مہم ءِ ملک انا 24ضلع غاتے ٹی چلیفنگا ہراٹی ہرچار آ صوبہ غاتا خاص انگا ضلع، آزاد جموں و کشمیر و اسلام آباد نا علاقہ غاک ہم اوار ئسر۔ وزیراعظم عمران خان چناتے پولیو آن بچفنگ نا پڑی کنفسا داعزم اٹ مہم نا بناءِ کریسس کہ حکومت پولیو نا چٹفنگ کن سنبرینگوک ءِ۔ وزیراعظم نا خصوصی کمکار جان جوڑی ڈاکٹر فیصل سلطان صوبائی حکومت و پولیو نا چٹفنگ اٹ جہانی شریدار آتے سرسہب مہم نا اڈتننگ آ مبارکبادی ترسا پارینے کہ پروگرام کن دااسہ حساس ءُ وخت اسے کہ او دین انا ہنداوڑ مون ءِ توریر و کیس آتا کچ ءِ زیرو آ اتیر۔ ننے ویکسین نا کمک اٹ چٹوک آ غٹ ناجوڑ ی تا توننگ کن جہد نا گرج ءِ۔ چناتے داموذی دین آن بچفنگ کن 2لکھ 25ہزار جان جوڑی رکھ فرنٹ لائن ورکراُرااُراغا ہنسا پنچ سال آن کم وئی ناچناتے رکھی پڑی کنفیر۔ ہراٹی پروگرام چناتا قوت مدافعت نا دوئی کننگ نا ہدف ءِ سرسہبی اٹ دوئی کرے۔ داوخت آ کورونا دین آن بچنگ نا رکھی گام گیج آتیا سختی اٹ عملدرآمد ءِ پک کننگا۔ جاری مروک بیان نا رداٹ کوآرڈینیٹر قومی ایمرجنسی آپریشنز سینٹر ڈاکٹر شہزاد بیگ پارے کہ جہانی شریدار و کمیونٹی نا کمک اٹ نن مہم نا ہدف ءِ سرسہبی اٹ دوئی کرین۔ داسرسہبی ءِ برقرار تخنگ کن داسہ حددرجہ خواری نا گرج ءِ تانکہ دین انا دُوارہ تالانی ءِ توننگ مرے۔ اوداہیت آ زور شاغساپارے کہ سخت خواری نا چرجوئی بایدے برجاسلے تانکہ دین ءِ روتہ غاتیان چٹفنگ ممکن مننگ کے۔ جاری مروک بیان نا رداٹ مہم اٹی جان جوڑی رکھ ہیلپ لائن 1166و وٹس ایپ ہیلپ لائن03467776546آ لمہ و باوہ غاتا راہشونی ءِ کننگا و مہم اٹی سلوک آ چناتے ویکسی نیشن ءِ ممکن کننگا۔ داہیت پاننگ نا قابل ءِ کہ پاکستان و ہمسایہ ملک اوغانستان دنیا نا اِرا ملک ءُ ہراڑے پولیو کیس داسہ ہم رپورٹ مننگ ءِ۔ پولیو آن پنچ سال اسکان نا وئی نا چناک زہمی مریرہ۔ داناجوڑی آن چناک مچ آ وئی کن معذور مریرہ۔داتسکان کہ چناک کہیرہ ہم۔ داموذی مرض آن چناتے پولیو آن بچفنگ نا پڑی کنفسا جان ءِ خلاص کننگ مریک۔ پنچ سال آن کم وئی چناتے پولیو پڑی کنفسا داموذی دین ءِ تالان مننگ آن بچفنگ مریک۔ وار وار آ پولیو نا پڑی کنفنگ آن دنیا نا غٹ ملک آک پولیو آن پاک مسنو۔پولیو تور مہم اٹ زیات آن زیات بشخ ہلنگ ننا غٹ انا قومی فرض ءِ۔
