اسلام آباد۔ 21جون (اے پی پی) چیئرمین سینیٹ، ڈپٹی چیئرمین سینیٹ و قائد ایوان و قائد حزب اختلاف ئسک بڑزکو ایوان نا مسکوہی باسک و پختونخواملی عوامی پارٹی نا سینئر راہشون عثمان خان کاکڑ نا کزیت آ ڈکھ انا درشانی ءِ کرینو۔ دوشنبے نادے آ تینا ہڑزخواہی کلہو اٹی چیئرمین سینیٹ محمد صادق سنجرانی پارے کہ ملک اسہ مدبر سیاست دان و انن اسہ گچین ءُ سنگت اسے آن محروم مسونن۔ چیئرمین سینیٹ پارے کہ ایماندار نا ملکی سیاست و پسماندہ تپہ غاتے کن خذمت آتے مدام یات تخنگک۔ اوپارے کہ عثمان خان کاکڑ نا مرک آ بھاز افسردہ و ڈکھیائی اُٹ۔ چیئرمین سینیٹ اللہ تعالیٰ آن دعا کرے کہ ایماندار نا بخشش ءِ کے و اودے جنت اٹ جاگہ ایتے و اونا خاہوت، عزیز و قریب آتے دا صدمہ ءِ برداشت کننگ نا ہمت عطافرمائفے۔ ڈپٹی چیئرمین سینیٹ مرزامحمد آفریدی تینا ہڑزخواہی کلہو اٹی غمزدہ خاہو ت تون ہڑزخواہی کرسا اللہ تعالیٰ آن خاہوت کن صبرو ایماندار نا بخشش کن دعاکرے۔ سینیٹ اٹی قائد ایوان سینیٹر ڈاکٹر شہزاد وسیم ہم پشتونخواملی عوامی پارٹی نا سینئر راہشون عثمان خان کاکڑ نا کزیت آ است ہسونی نا درشانی ءِ کرینے۔ تینا ہڑزخواہی کلہو اٹی اوپارے کہ ایماندار نا تیناپارٹی کن خذمت آتے مدام یات تخنگک۔ عثمان خان کاکڑ نا کزیت آن ڈکھ مس۔ قائدایوان سینیٹ دعا کرے کہ اللہ تعالیٰ ایماندار نا بخشش و خاہوت ءِ دا صدمہ ءِ سگنگ نا ہمت و حوصلہ عطافرمائفے۔ قائد حزب اختلاف سینیٹ سینیٹر سید یوسف رضاگیلانی مسکوہی سینیٹر و پختونخواملی عوامی پارٹی نا سینئر راہشون عثمان خان کاکڑ نا کزیت آ ڈکھ انا درشانی ءِ کرسا اللہ تعالیٰ آن ایماندار نا بخشش و خاہوت کن صبر و جمیل نا دعاکرے۔ قائد حزب اختلاف پارے کہ ایماندار ایوان اٹ پسماندہ تپہ غاتا حق اکن توار بڑز کرے و اونا کزیت آن بھاز بھلو سیاسی خلاء اس ودکی مسنے ہرادے پُرکننگ مشکل ءِ۔
