کوئٹہ۔ 18جون (اے پی پی) بلوچستان حکومت بروک آ مالی سال انا بجٹ اٹی سرکاری ملازم آتا تنخواہ و پنشن اٹی 10درسد ودکی و گریڈ 1آن گریڈ 19اسکان نا ہمو ملازم ہرافتا جم الاؤنس آک اوفتا بنداوی تنخواہ آن کم ءُ ءِ پین ریلیف تننگ کن اوفتا بنداوی تنخواہ ٹی 15درسد نا حساب اٹ ڈسپیریٹی ریڈکشن الاؤنس تننگ نا پڑو ءِ کرینے۔ داہیت ءِ صوبائی وزیر خزانہ میر ظہور احمد بلیدی جمعہ نادے آ بروک آ مالی سال انا بجٹ ءِ ایوان اٹ پیش کرساپارے۔ اوپارے کہ سرکاری ملازم آتے ریلیف تننگ کن صوبائی حکومت غٹ سرکاری ملازم آتا تنخواہ و پنشن اٹی 10درسد ودکی نا پڑو ءِ کیک داڑتون اوار اوار حکومت ملازم آتا مشکل آتا ادراک ءِ کرسا کچ اٹنگا وسیلہ غاتیان پد ہم گریڈ 1آن گریڈ 19اسکان نا ہمو ملازم ہرافتا جم الاؤنس آک اوفتا بنداوی تنخواہ آن کم ءُ ءِ پین ریلیف تننگ کن اوفتا بنداوی تنخواہ ٹی 15درسد نا حساب اٹ ڈسپیریٹی ریڈکشن الاؤنس نا پڑو ءِ کیک۔ اوپارے کہ ریٹائرڈ مروک آ ملازم آتا مشکل آتے مون آ تخسا صوبائی حکومت سرکاری ملازم آتا ریٹائرمنٹ آن دمدستی پد پنشن دستاویز آتا پورومننگ اسکان اودے آخیریکو بنداوی تنخواہ نا 65درسد پنشن نا بطور Anticipatory Pensionجاری کرینے تانکہ ریٹائرڈ ملازم آتے مالی مشکل آتون مون تروئی تمپ۔ اوپارے کہ صوبائی حکومت چندی محکمہ خاص وڑاٹ محکمہ جان جوڑی، تعلیم و Revenue Generatingڈیپارٹمنٹ آتے ٹی ادارتی کہول و انفرادی وڑاٹ گچین کارکڑد آ پروموٹ کننگ کن پرفارمنس گرانٹ سسٹم نا نظام ءِ نافذ کرینے ہراڑآن گچین کارکڑد نشان تروک آ ادارہ و بندغ آتے انعام تننگک۔
