کوئٹہ۔ 18جون (اے پی پی) صوبائی وزیر خزانہ میر ظہور بلیدی محکمہ جان جوڑی نا بابت بجٹ تقریر اٹی پارے کہ مقد س ایوان نا مون آ کورونا دین انا دینی حالیت آتا رداٹ ہیلتھ رسپانس اسٹریٹجی پیش کننگانے، 2020ء آن دنیا ءِ کورونا دین انا ہلہلہ ئی حالیت آتون مون تروئی تمنگ ءِ۔ ننا حکومت دینییا ہلہلہ ئی حالیت آتے ٹی پیشگی گام گیج کننگ کن بلوچستان کمانڈ و آپریشن سینٹر(BCOC)ءِ جوڑ کننگانے ہراکہ گچین رابطہ کاری و پیشگی گام گیج کننگ تون اوار ایلو اہم امور اٹ متحرک کڑد ادا کننگ ءِ۔ ڈویژنل کہول آ کمشنرز آتا چاروکی ٹی ڈویژنل کمانڈو کنٹرول سینٹر (DCOC)ایمرجنسی حالیت آتے ٹی ریلیف آپریشنز نا زمواری تے سرتننگ ءِ۔ صوبائی وزیر خزانہ پارے کہ صوبائی حکومت شرفمند آ ایوان نا توسط اٹ کورونا دین انا دینی حالیت آتے ٹی ہرامحکمہ و ادارہ خاص وڑاٹ جان جوڑی نا بشخ اتون گنڈوک ڈاکٹر، نرس، پیرامیڈیکل اسٹاف تون اوار کانود نافذ کروک آ ادارہ و سرکاری ملازم آک ایمرجنسی سروسز فراوان کرینے داغٹ انا خذمت آتا اعتراف ءِ کرسا اوفتے خراج تحسین پیش کینہ۔ اوپارے کہ کورونا دین آن بچنگ کن رکھی ٹیکہ غاتا پروگرام نا بناءِ کننگانے و ننا عزم ءِ کہ بنجائی حکومت این سی او سی نا کمک اٹ غٹ آبادی ءِ دا جان ہلوک آ مرض آن بچفنگ نا ویکسین خلنگک تانکہ نن دادینی مرض آن بچنگ کین و تینا و بروک آ چین تے رکھ جوڑ کننگ کین۔ اومستی پارے کہ صوبہ ٹی شاہراہ تیا شکست آتیان مرک آتا کچ بھاز زیات ءِ۔ ننا حکومت السی است خواہی تا رداٹ 3.921بلینروپئی نا بھلو زراسے آن اہم شاہراہ تیا ایمرجنسی رسپانس سینٹرجوڑ کننگ ءِ دا مد اٹ داتم اسکان 787ملین روپئی جاری کننگانے و بروک آ مالی سال 2021-22اٹی داڑکن 717.640ملین روپئی جتا کننگانے۔
