اللہ تعالیٰ صوبہ بلوچستان نا گل زمین ءِ بے پناہ قدرتی وسیلہ تسنے ہرانا اہمیت ءِ مچ آ دنیا امنا کیک، صوبائی وزیر خزانہ میر ظہور احمد بلیدی

بلوچستان عوامی پارٹی و اونا سیوتی جماعت آتا مسٹ میکو سالانہ بجٹ 2021-22بلوچستان اسمبلی ٹی پیش

کوئٹہ۔ 18جون (اے پی پی) صوبائی وزیر خزانہ بلوچستان میر ظہور بلیدی 2021-22ء نا بجٹ ءِ  پیش کرسا پارینے کہ بلوچستان عوامی پارٹی و اونا سیوتی جماعت آتا مسٹ میکو سالانہ بجٹ 2021-22دامقدس ایوان نا مون آ پیش کننگ کنکن شرف و خوشی نا سوب ءِ۔ اللہ تعالیٰ صوبہ بلوچستان نا گل زمین ءِ بے پناہ قدرتی وسیلہ تسنے، ہرانا اہمیت ءِ دنیا امنا کیک، ننا آبادی کم و وسیلہ غاک بے شمار ءُ، آبادی و وسیلہ غاتا داتناسب علاقہ سے نا شونداری کن خوش بختی نا سوب ءِ۔ صوبائی وزیر خزانہ بلوچستان میر ظہور احمد بلیدی پارے کہ وزیراعلیٰ بلوچستان جام کمال خان نا مدبرانہ و متحرک سرکڑدہ ئی ٹی نن مچ آ صوبہ ٹی شونداری و شونہالی نا مثبت کنڈآ ہِننگ اُن۔ زرگزرانی و راجی ہدف آتا دوئی و مخلوق نا زند انا آب ءِ بڑز کننگ کن ہمہ جہت گام گیج کننگ انگ ءِ۔ دُن تو کورونا دین انا سوب آن مچ آ ملک انا جم زرگزرانی شونداری ءِ دھچکہ لگانے ولے اللہ تعالیٰ نا فضل و کرم و صوبائی حکومت نا گچین حکمت عملی اٹ نن دا مشکل حالیت آتا نرزوری اٹ مقابلہ ءِ کرینن و غٹ بشخ آتے ٹی گچینی نا کنڈآ ہِننگ اُن۔، بروک آ مالی سال 2021-22ء نا بجٹ اینخو مالی سال انا بجٹ نا تسلسل ءِ و داہڑتوم آ سال آتا بجٹ آ کورونا دین ہراکہ اسہ جہانی ءُ دین اسے نا دروشم اختیارکرینے، ہرانا مون ءِ توننگ کن درکار وسیلہ مہیا کرین بلکن صوبہ نا جم جان جوڑی نا نظام آ بھلو زر اس خڑچ کننگانے۔ بظاہر دادین انا خطرہ چٹتنے ولے داچرجوئی ٹی نن المی گام گیج کرینن و بروک آ مالی سال 2021-22کن دامد اٹی 3.637بلین روپئی جتا کننگانے ہراٹی بنجائی حکومت نا کنڈآن 2.937بلین روپئی نا گرانٹ ہم اوار ءِ۔ داجتا کروک فنڈ آن صوبہ ٹی 5پوسکن ءُ لیبارٹری ہم جوڑ کننگک۔ صوبائی وزیر خزانہ بلوچستان میر ظہور احمد بلیدی پارے کہ ساڑی حکومت تدوک آ مسہ سال اٹی بروک آ چین تا راجی آسراتی، بنداوی پنجر نا شونداری و شونہالی تون اوار السی اولیت آتا روشنا اصول آتے مون آ تخسا پالیسی جوڑ کننگ، کانود جوڑ کننگ و فیصلہ سازی ءِ الس نا است خواہی و گرج آتا رداٹ ترتیب ترسا کرینے و مسہ سال اٹی پیش کروک آ غٹ بجٹ بشمول دا بجٹ نا مچ آ صوبہ نا غٹ ضلع غاتے ٹی بیدس پرخ انا ہرممکن گام گیج کننگ ءِ۔ صوبہ ٹی گڈ گورننس و انتظامی باندات آتے ٹی پین اصلاحات تون اوار محصول و کٹیاٹی ودکی کن گام گیج کننگ انگ ءِ۔ مالی مشکل آتیان پد ہم صوبائی حکومت بروک آ مالی سال اکن اسہ بریبر ءُ بجٹ اس جوڑکرینن و غٹ بشخ آتے کن اوفتا گرج آتا رداٹ فنڈ جتا کننگانے۔ صوبائی وزیر خزانہ بلوچستان میر ظہور احمد بلیدی بجٹ تقریر کرسا مستی پارے کہ بجٹ 2021-22اٹی صوبہ نا مر مر انگا پسماندہ علاقہ غاتے ٹی اسہ وڑ بنداو تیا انفراسٹڑکچر نا گچینی ہلہلہ ئی حالیت آتے ٹی پیشگی گام گیج کننگ و پوسکنی آ مبنی اصلاحات درستی راستی کرفنگ، سوشل سیکٹر ءِ مربوط جوڑ کننگ، صوبہ نا تینا پیدواری بشخ آتیان پین سودمند مننگ، راجی رکھ اکن گام گیج آتے ودفنگ تون اوار روزگار نا پوسکن ءُ وارخواہی ودی کننگ و امن و ایمنی نا پورو بحالی اوار ءِ۔