ساڑی حکومت اولیکو وار کشاری بشخ انا گچینی کن گام گیج کرینے، سینیٹر اعجاز چوہدری نا بڑزکو ایوان نا دیوان اٹی گپ وتران

اسلام آباد۔ 18جون (اے پی پی) پاکستان تحریک انصاف نا سینیٹر اعجاز چوہدری پارینے کہ ساڑی حکومت اولیکو وار کشاری بشخ انا گچینی کن گام گیج کرینے، مستین اٹ کشاری بشخ ءِ گوجالنگا، پوسکن آ پاکستان ہاؤسنگ اسکیم بے اُرا بندغ آتے اُرا فراوان کننگ کن جوان ءُ اسکیم اسے۔ وزیراعظم عمران خان وزیراعظم ہاؤس و وزیراعظم آفس نا خڑچ آتے ٹی کفایت شعاری نا کمک اٹ بھلو زراس بچت کرینے۔ جمعہ نادے آبڑزکو ایوان نا دیوان اٹ بروک آ مالی سال 2021-22ء نا بجٹ آ شرہ ٹی بشخ ہلسا اوپارے کہ ملک انا 65آن 70درسد آبادی کشت وکشار تون وابستہ ءِ۔ مسکوہی حکومت آک کشاری بشخ و اصلاحات آ ہچ ءُ چکار اس کتور، ساڑی حکومت نا گام گیج آتا سوب آن مسہ سال اٹی بزغرآتے ہرفصل اٹ کٹیاءِ، داسہ 90درسد بزغر بے سود وام ہلنگ کیرہ، ٹیکٹر و ایلو کشاری ازباب آتیاہم بے سود وام تننگ انگ ءِ، بزغرآتے اوفتا فصل انا گچین معاوضہ و اودے رکھ جوڑ کننگ کن کمیونٹی سٹوریج نا تصور ءِ پیش کننگانے۔ بجٹ اٹ 12ارب روپئی کشاری گرج آتے کن تخنگانے۔ اوپارے کہ پوسکن آ پاکستان ہاؤسنگ اسکیم بے اُرا بندغ آتے چھت فراوان کننگ نا ڈٹ ءِ ہراٹی 300ارب روپئی نا زرکاری مریک و 20لکھ روپئی وام 3آن 5درسد نا کچ آ دوئی کننگ مریک، مسہ لکھ روپئی حکومت سبسڈی ایتک، پیپلزپارٹی 35سال مست 50کروڑ روپئی نا خڑچ آن ہاؤسنگ اسکیم نا بناءِ کریسس و دااسکیم نا رداٹ تروک آ وامک بھوت بنگلہ اس جوڑ مسنو، دا50کروڑ روپئی نا حساب ءِ دیراس ایتک۔ اوپارے کہ پاکستان نا 22کروڑ آبادی ٹی بیرہ 29لکھ بندغ خراج گوشوارہ جمع کرفرہ، اسسٹنٹ کمشنر اس پوریاگراسے دزگیر کننگ کپک، نن خراج نظام اٹ بدلی ایسونن۔