وزیراعظم عمران خان پنچ سال ءِ پورو کیک، اسلام آباد اٹی سیکورٹی نا گچینی کن گام گیج کننگ انگ ءِ، وزیر داخلہ شیخ رشید احمد

اسلام آباد۔ 18جون (اے پی پی) وزیرداخلہ شیخ رشید احمد پارینے کہ جوان ءُ ہیت اسے کہ پارلیمان چلینگ نا بناءِ کرینے، مسہ دے انتس کہ مس اودے الس جوان انگا نظر اٹ ہتو، وزیراعظم عمران خان پنچ سال ءِ پورو کیک، ضلعی انتظامیہ و پولیس اسلام آباد ءِ بے مٹ ءُ شار اس جوڑ کیر، زوراور آتے ہلیر، ملک انا اسل ویل دادے کہ بیرہ غریب کانودنا دوٹی بریک۔ جمعہ نادے آ داڑے ایگل اسکواڈ نا فلیگ مارچ انا دود انا وخت آ میڈیا نا نمائندہ غاتون گپ وتران کرسا وزیر داخلہ پارے کہ اسلام آباد پولیس وانتظامیہ دارالحکومت ءِ اسہ بے مٹ ءُ شار اس جوڑ کیر، اسلام آباد ءِ منشیات آن پاک کننگے و آئیس، ہیرون نا بھلا بھلا ڈیلر و ریکٹس آتے ہلنگے، کانود بیرہ غریب آتا برخلاف حرکت اٹ بف، ملک انا اسل ویل ہندادے کہ غریب کانود نا مون اٹ بریک وخت اس کہ بھلا تا برخلاف کارروائی مفک۔ وزیر داخلہ پارے کہ اسلام آباد اٹی ایلوشارتیان بھلو کچ اسے ٹی نقل مکانی مسنے۔ نواحی علاقہ غاتے ٹی پین پوسکن ءُ تھانہ جوڑ کننگ نا گرج ءِ، اسلام آباد اٹی سیکورٹی نا گچینی کن گام گیج کننگ انگ ءِ۔ پولیس شاری تے شرف ایتے و لس شاری نا کاریم بایدے آسانی اٹ مرے۔ اوپارے کہ اسلام آباد اٹی سیل و سواتی تا بھلو کچ اس بریک و داکان گدرینگسا مون آ سیل و سواتی ہند آتا کنڈآہم مخلوق کاہک۔ اسلام آباد اٹی ناکہ غاتے چٹفینن۔ مخلوق کن آسانی و آسودہی ودی کننگ اُن۔ ای پاسپورٹ جاری کننگک و 2ہزار ودکی فیس اٹ اسہ دے اٹی ہم پاسپورٹ ملک۔ ویزہ سسٹم ءِ آن لائن کرینن۔ چینی شاری تے 90دے انا جاگہ غا 2سال انا ویزہ تننگ اُن۔ اوپارے کہ اسلام آباد پولیس اٹی ایس ایچ او تے براہ راست فنڈ تننگ اُن۔ پیشن آن ہم آفیسر آتے دانگیا اتنگ اُن۔ پولیس تون فنڈ انا کمتی ءِ اوفتے پین وسیلہ ایتنہ، اوفتا تنخواہ و الاؤنس آتے ہم ودفنہ۔ وزیرخزانہ تون داچرجوئی ٹی ہیت کیوہ۔ اسہ سوج اسے نا ورندی ٹی اوپارے کہ زالبول آتے کن جتا ءُ بازار اس ہم جوڑ کننگ اُن۔ ہندن ءُ جوان ءُ بازار اس جوڑ کینہ ہراڑے زالبول آتا دوکانک مریرہ و ریسٹورنٹ و بڑزکو آب انا گڑاہم دوئی مریک، قومی میرات ءِ ہم دانا کمک اٹ مون آ دننگک۔ وزیرداخلہ پارے کہ پولیس ٹ ہراڑے خامی و نزوری مرے تو میڈیااونا پیدواری ءِ کیک، داجوان ءُ ہیت اسے۔ اینو نا دور اٹی کیمرہ اسہ بھلو واک اس جوڑ مسنے۔ نن میڈیا نا شرف ءِ کینہ۔ اسہ سوج اسے نا ورندی ٹی وزیرداخلہ پارے کہ مسہ دے پارلیمان اٹی انتس کہ مس او جوان متو، داڑآن جمہوریت ءِ شرف ملتو، خوانوک آک دادے جوان انگا نظراٹ ہتور، اللہ نا شکر ءِ کہ پارلیمان داسہ چلینگ نا بناءِ کرینے۔نن اپوزیشن تون جوڈوکراٹے کننگ کن آخا بلکن اودے تین تون اوار دننگ خوانہ۔ اپوزیشن اٹ دم خم اف، دادسمبراٹ حکومت ءِ چٹفنگ نا پڑو ءِ کریسر ولے اوفتا رنگ پشٹم تولوک ءِ، پلگ آتے ٹی تا کچراارے و انجن مول خلنگ ءِ۔ عمران خان پنچ سال ءِ پورو کیک۔ وزیر داخلہ 150موٹرسائیکل سوار آتیا تالان ایگل سکواڈ نا معائنہ ءِ کرے و پولیس ءِ پنت و شون کرے کہ او پورو تیاری و کسبی لگن اٹ تینا فرض ءِ سرایتر۔