اسلام آباد۔ 18جون (اے پی پی) بنجائی وزیر توانائی حماداظہر پارینے کہ حکومت ڈھانچہ جاتی اصلاحات آ عمل کننگ ءِ، اصلاحات نا رداٹ خام مال آ 100 ارب روپئی اسکان نا رعایت تننگانے، ایکسچینج ریٹ ءِ مارکیٹ نا بنداو آ استوار کننگا۔ اسمگلنگ ءِ چٹفنگا، راجی رکھ انا دنگ اٹ ودکی کننگا، جان جوڑی انصاف کارڈ داسہ پنجاب اٹی ہم تننگ انگ ءِ، حکومت برآمدآتیا مبنی ودیکی آ عمل کننگ ءِ، ننا صنعت آک شون ہلنگ ءُ، انگریزی ہیت کننگ آن کرپشن نا داغ ساف مفک، ساڑی حکومت 22سال انا جہد آن پد بسنے، ننا شہرت دہ درسد و بیست درسد نا بنداو آ آخا بلکن کارکڑد آ ٹی ءِ۔ جمعہ نادے آ قومی اسمبلی ٹی پاکستان پیپلزپارٹی نا چیئرمین بلاول بھٹو زرداری نا بجٹ تقریر اٹی چست کروک آٹ آتا ورندی ءِ ترسا حماد اظہر پارے کہ ساڑی حکومت 22سال انا جہد آن پد بسنے۔ ننا شہرت دہ درسدو بیست درسد نا بنداو آ اف۔ اوپارے کہ قائد حزب اختلاف نا نشست آن شریں مزاری نا بارواٹ ہراریمارکس بس او ریکارڈ نا بشخ و و اوڑآ معافی خواہنگتو۔ مسلم لیگ (ن) نا اسہ باسک اس پارے کہ کرینگ تننگ پنجاب نا کلچر ءِ، ہراسٹ کہ داوڑ پاننگ ءِ او پنجاب نا تاریخ ءِ لتاڑنگ ءِ۔ حماد اظہر پارے کہ پیپلزپارٹی نا پنچ سالہ دور اٹی اسہ سال اس ہم داوڑ تدینگتنے، ہراٹی حکومت چار درسد نا ودیکی دوئی کے۔ کبینی نا کچ داوخت آ ہشت ءُ نیم درسد ءِ۔ پیپلزپارٹی نا دور اٹی اولیکو سال اٹی 21 درسد، ارٹ میکو سال اٹی 11.7درسد، مسٹ میکو سال 13.7درسد و چارمیکو سال اٹی 11 درسد مسوسس۔ بے نظیر انکم سپورٹ پروگرام نا ذکر ءِ ہم کننگا۔ انت داہموپروگرام تو اف ہراڑآ فرزانہ راجہ 150کروڑ روپئی اتون نروک ءِ۔ ساڑی حکومت ہراتم برسراقتدار بس تو داپروگرام اٹ سرکاری مخلوق ءِ ہم اوار کننگاسس۔
