کریانہ اسٹور تا نظام نا ڈیجیٹلائزیشن آن نئے بیرہ محصول آتے ٹی ودکی و کنوئی آ گڑاتا نہاد آتے ٹی کمتی اتنگ اٹ کمک ملک بلکن ٹارگٹ سبسڈیز تننگ اٹ ہم کمک رسینگک، وزیراعظم نا خصوصی کمکار راجی رکھ و تخفیف نیزگاری ڈاکٹر ثانیہ نشتر

اسلام آباد۔ 18جون (اے پی پی) وزیراعظم نا خصوصی کمکار راجی وکھ و تخفیف نیزگاری ڈاکٹر ثانیہ نشتر پارینے کہ کریانہ اسٹورتا نظام نا ڈیجیٹلائزیشن آن نئے بیرہ محصول آتے ٹی ودکی و کنوئی آ گڑاتا نہاد آتے ٹی  کمتی اتنگ اٹ کمک رسینگک بلکن ٹارگٹ سبسڈیز تننگ اٹ کمک کمک ملک، بروک آ مالی سال اٹی پین 28ضلع غاتے بے سود وام پروگرام اٹ اوار کننگک، احساس رکھ پروگرام ءِ ودفنگک، ساڑی آبجٹ اٹ صنعت، کاروبار و الس ءِ ریلیف فراوان کننگ کن چندی گام گیج کننگانے۔ جمعہ نادے آ بڑزکو ایوان اٹ بروک آ مالی سال 2021-22ء نا بجٹ آ شرہ ٹی بشخ ہلسا ڈاکٹر ثانیہ نشترپارے کہ بجٹ اٹ حکومتی اولیت آتا تعین ءِ کننگانے، زرگزرانی سرجزآتا مون آ دننگ و الس نا مشکل آتا ازالہ ءِ کننگ حکومت نا اولیت ءِ، دابجٹ اٹ تنخواہ دار تپہ غا ہچءُ خراج اس خلنگتنے، مزور نا کم آن کم اجرت ءِ 20ہزار روپئی مقرر کننگانے، 260ارب روپئی احساس پروگرام کن جتا کننگانے۔ اوپارے کہ خصوصی اقتصادی زون تیا خراج چھوٹ، سیلز خراج آ چھوٹ، کیپیٹل گین خراج اٹ کمتی، ٹیلی کام خراج اٹ کمتی و کسٹم ڈیوٹی نا مد اٹ صنعت آتا خام آ چھوٹ تننگانے۔ اوپارے کہ الیکٹریکل وہیکل و چنکا گاڈی تیا خراج ءِ کم کننگانے، بینکنگ ٹرانزیکشن آ ودہولڈنگ خراج ءِ چٹفنگانے۔ اوپارے کہ 2021ء ٹی احساس پروگرام کن 209ارب روپئی جتا کننگاسس ہرافتیان 97درسد خڑچ مسنو، اینخو نا سال داپیسہ غاتے ودفسا 260ارب روپئی کننگانے، تدوک آ مالی سال اٹی ملک گیر سروے نا کاریم 93درسد پورو مسنے، حقدار آتے بینکنگ نظام نا کمک اٹ زرآتا فراوانی ءِ پک کننگ انگ ءِ، تدوک آ مالی سال اٹی احساس کفالت پروگرام اٹ 70لکھ مخلوق ءِ اوار کننگا، چناتیکن تعلیمی وظیفہ نا پروگرام 151ضلع غاتسکان ودفنگا، وظیفہ نا زراٹ ودکی کننگا، کورونا دین اٹی اسہ کروڑ 50لکھ بندغ ءِ شفاف وڑاٹ 12ہزار روپئی نا امداد تننگا، اسہ لکھ طالب علم آتے اسکالرشپ تننگا، ڈیلیوری یونٹ نا جوڑ کننگ، ڈیجیٹل گورننس، آئی ٹی اصلاحات کننگا۔ اوپارے کہ دابجٹ اٹ اسہ کروڑ 20لکھ بندغ ءِ احساس ایمرجنسی کیش انا مد اٹ 12ہزار روپئی امدادملک۔