اسلام آباد۔ 18جون (اے پی پی) وزیرخارجہ مخدوم شاہ محمود قریشی جمعہ نادے آ ترکی ٹی انطالیہ ڈپلومیسی فورم نا وخت آ فلسطینی وزیرخارجہ، ڈاکٹر ریاض المالکی تون اوڑدہی کرے۔ اوڑدہی ٹی ہڑتوم آ کنڈآتا تعلقداری، ڈیہہ نا حالیت آتون اوار تین پہ تینی است خواہی نا باندات آ گپ وتران کننگا۔ فلسطین نا وزیرخارجہ ڈاکٹر ریاض المالکی فلسطین اٹ امن وایمنی نا حالیت آتا بابت معلومدار کرے۔ شاہ محمود قریشی پارے کہ فلسطین نا قضیہ دے ٹک نیامی ٹی بے چینی نابنداوی سوب ءِ۔ پاکستان، 1967آن مست انا سیمی حالیت و اقوام متحدہ نا قراردادآتے مون آتخسافلسطین نا ویل انا ایسری نا دوریاستی ایسری نا مخ تف ءِ۔ پاکستان فلسطینی الس نا حق خودارادیت نا جہد نا مخ تفی ءِ کیک۔ وزیرخارجہ فلسطینی ہم منصب ءِ، فلسطین نا ویل انا پرامن ایسری کن پاکستان نا کنڈآن کروک آ سفارتی کوشست آتیان معلومدار کرے و فلسطین نا ویل آ او آئی سی و عرب لیگ نا کوشست آتا ستاءِ کرے۔ وزیرخارجہ وزیراعظم عمران خان، پاکستانی سرکڑدہ و الس نا کنڈآن، فلسطینی سرکڑدہ غاتون یکجہتی نا درشانی ءِ کرے۔ وزیرخارجہ شرٹ انا ٹیکی اس وزیرخارجہ ءِ پیش کرے ہراڑآ نوشتہ ئس”اے ارض۔ فلسطین ای ہم ساڑی اُٹ“۔ فلسطینی وزیرخارجہ فلسطین نا ویل انا بابت پاکستان نا پیدوار، دوٹوک و اصولی موقف نا ستاءِ کرسا علاقائی و جہانی کہول آ پاکستان نا سفارتی کمکاری آ پاکستان نا سرکڑدہ و وزیرخارجہ مخدوم شاہ محمود قریشی نا منت واری ءِ ہرفے۔ وزیرخارجہ فلسطینی وزیر خارجہ ءِ دورہ پاکستان نا سلہ خلک ہرادے او منت واری اتون امنا کرے۔
