اوغانستان آن درملکی فوج انا پیش تمنگ آن پد جہانی برادری نا پدریسہ انگیجمنٹ المی ءِ، وزیرخارجہ مخدوم شاہ محمود قریشی نا یورپی یونین نا نمائندہ تون اوڑدہی، اوغانستان و کشمیر نا حالیت، اسلاموفوبیاغا گپ وتران

اسلام آباد۔ 18جون (اے پی پی) وزیرخارجہ مخدوم شاہ محمود قریشی پارینے کہ اوغانستان آن درمکی فوج انا پیش تمنگ آن پد جہانی برادری نا پدریسہ انگیجمنٹ المی ءِ۔ یورپی یونین بھارت نا غیرکانودی کوزہ گیری ٹی جموں و کشمیراٹی انسانی حق انامنظم و بھلا خلاف ورزی تا نوٹس ءِ ہلے۔ وزیرخارجہ انطالیہ ڈپلومیسی فورم نا دیوان نا وخت آ جمعہ نادے آ ترکی ٹی یورپی یونین نا بڑزکو نمائندہ جوزف بورئیل تون اوڑدہی کرے۔ دفترخارجہ نا رداٹ ہڑتوم آ راہشونک پاکستان و یورپی یونین نا ہڑتوم آ کنڈآتا تعلقداری، علاقائی حالیت و تین پہ تینی است خواہی نا باندات آ گپ وتران کریر۔ اوڑدہی ٹی اوغان امن عمل و غیرکانودی وڑاٹ بھارت نا غیرکانودی کوزہ گیری ٹی جموں و کشمیر نا باندات آہم گپ وتران کننگا۔ وزیرخارجہ پارے کہ پاکستان ویورپی یونین اسٹریٹجک انگیجمنٹ پلان آ عملدرآمد آن ہڑتوم آ کنڈآتا تعلقداری پین سوگو مس۔ شاہ محمود قریشی پارے کہ جی ایس پی پلس ہڑتوم آ کنڈآتا وڑاٹ فائدہ ئی جوڑ مس، ہڑتوم آ کنڈآتا واپار نا مون آ دننگ اٹ اواہم کڑد اداکرے۔ جی ایس پی پلس ناکمکاری چرجوئی آن پاکستان و یورپی یونین ملک آتے ٹی زرگزران و واپار ءِ پین مون آ دننگ اٹ کمک رسینگک۔ وزیرخارجہ پاکستان نا کنڈآن جی ایس پی پلس نا بابت 27ٹکی انٹرنیشنل کنونش تیا گچین عملدرآمد نا باوری کرفے۔ وزیرخارجہ پارے کہ پاکستان، ایف اے ٹی ایف نا کنڈآن چست کروک 27ٹک آتیان 26ٹک آتیا عملدرآمد ءِ پوروکرینے۔ اومیت ءِ کہ فیٹف نا بروک آ دیوان اٹی پاکستان نا سنجیدہ کوشست آتے مون آتخسا، گرے لسٹ نا فیصلہ غانظرثانی کننگک۔ ہڑتوم آراہشونک کورونا دین انا جہانی دین انا بابت باندات آہم گپ وتران کریر۔ وزیرخارجہ پاکستان اٹ کورونا دین انا مون ءِ توننگ کن حکومتی گام گیج آتیان معلومدار کرے۔ وزیرخارجہ یورپی یونین نا بڑزکو نمائندہ ءِ اسلاموفوبیا نا ودوک آ رجحان آ پاکستان نا گڑتی تیان معلومدار کرے۔ اوپارے کہ اوغانستان آن درملکی فوج انا پیش تمنگ آن پد جہانی برادری نا پدریسہ انگیجمنٹ المی ءِ۔ ہڑتوم آ راہشونک غٹ اوغان فریق آتیا اوغان امن عمل اٹ سیاسی تصفیہ کن ساڑی آ تاریخی موقع غان فائدہ ہرفنگ آ زور شاغار و اوغان امن عمل اٹ کمکاری، اوغان باہوٹ آتا آبادکاری ٹی کمکاری و پیش تمنگ آن پد اوغانستان نا سوگوی کن کوشست آتے برجاتخنگ آ امناکریر۔