اسلام آباد۔ 18جون (اے پی پی) وزیراعظم عمران خان پوسکن آ داسو ڈیم انا تفنگ کن کاریم کروک آ کارندہ و انجینئرآتے خراج تحسین پیش کرساپارینے کہ ملکی شونداری کن دا ڈٹ بھاز اہمیت تخک، داڑآن آخبت اٹ ملک ءِ اڑزآن بجلی دوئی مریک۔ داخیال آتا درشانی ءِ او جمعہ نادے آ داسو ڈیم انا تعمیراتی کاریم نا جاچ ءِ ہلنگ نا وخت آ گپ وتران کرسا کرے۔ وزیراعظم زیر تعمیر ڈیم انا چندی بشخ و ٹنل نا معائنہ کرے۔ اوپارے کہ دااسہ مشکل ءُ کاریم اسے ہرادے انجام تننگ اٹ ای درملکی انجینئرآتون اوار غٹ کارندہ غاتے خراج تحسین پیش کیوہ۔ اوپارے کہ داڈٹ آن ملک ءِ اڑزآن بجلی ملک۔ داوڑنا ڈٹ آتے بایدے بھاز مہالو بناکننگوسس تانکہ ملک اکن اڑزآن بجلی دوئی مسکہ۔ ہراوڑ منگلا و تربیلا غان ملک ءِ اڑزآن بجلی دوئی مس و پاکستان نا صنعت آتے داڑآن فائدہ ہرفنگ نا موقع ملا و ملک شونداری نا کنڈآ ہنا۔ وزیراعظم پارے کہ زرگزران گچین مننگ ءِ۔ ملک ترندی اٹ مون آ ہِننگ ءِ۔ اڑزآن بجلی نا دوئی کننگ آن آخبت اٹ صنعتی و اُرائی گرج آک پورو مریرہ و صنعت آک شون ہلیرہ ہراڑآن ملک ہم شون ہلیک۔ یات سلے کہ داسو ڈیم فیزون 2025ء ٹی پورو مرسا نیشنل گریڈ اٹی 2160میگاواٹ نا فراوانی بناکیک وخت اس کہ 2029اٹی فیز ٹو انا پورو مننگ آن پد ڈیم انا کچ 4320میگاواٹ مریک۔ وزیراعظم عمران خان نا پاور سیکٹر اصلاحات و ملکی دیر انا وسیلہ غاتا گچین کاریم اٹ اتنگ نا ویژن نا رداٹ ساڑی دور حکومت اٹ داسو ڈیم آ کاریم نا رفتار ءِ ودفنگا۔ ڈیم انا تفنگ کن ڈغار نا ہلنگ نا کاریم پورو کننگا و کورونا دین آن پد ہم ایس اوپی تیا عملدرآمد کرسا ڈیم انا تفنگ برجاءِ۔
