داسو ڈیم منصوبگ ملکی دیمروئی ءِ واستہ سک باز ارزشتی انت، ایشی ءَ چہ سستائیں توان در جنگ بیت کنت، مزن وزیر عمران خان ءِ داسو ڈیم ءِ جوڑیشتی کار  آنی چار ءُ تپاسی گرگ ءِ موہ ءَ تران، باسک ءُ انجینیئرز آناں توسیپ ءُ ستا

اسلام آباد۔18جون  (اے پی پی): مزن وزیر عمران خان ءَ نوکیں داسو ڈیم ءِ جوڑیشت ءِ واستہ کار کنوکیں باسک ءُ انجینیئرز آناں توسیپ ءُ ستا پیش  کنان ءَ گوشت کہ  ملکی دیمروئی ءِ واستہ اے منصوبگ سک باز ارزشتی انت ، ایشی ءَ چہ آیوکیں باندات ءَ ملک ءَ را سستائیں توان رس ایت۔ اے ھیالانی  درشانی آئی ءَ آدینگ ءِ روچ ءَ داسو ڈیم ءِ جوڑیشتی کار آنی چار ءُ تپاسی ءِ ساھت ءَ تران کنان ءَ کت۔ مزن وزیر ءَ جوڑیشت بوھوکیں ڈیم ءِ جتا جتائیں بھر ءُ ٹنل آنی چار ءُ تپاس کت۔ آئی ءَ گوشت کہ اے یک مشکلیں کار ات  ایشی ءِ سرجم کنگ ءَ  گیر ملکی انجینیئرز آں ھوار باسک آناں توسیپ  ءُ ستا پیش کناں۔  آئی ءَ گوشت کہ اے منصوبگ ءَ چہ ملک ءَ را سستائیں توان رس ایت۔  اے رنگ ءَ منصوبگ  باز پیسر ءَ بندات بہ بوتین اتنت۔ تانکہ ملک ءِ واستہ سستائیں توان  پجاری بوتین ات۔ ھمے رنگ ءَ منگلا ءُ تربیلا ءَ چہ ملک ءَ را سستائیں توان  رستگ ءُ پاکستان ءِ  صنعت آنان  ایشی  ءَ چہ سیت چست کنگ ءِ موہ  رستگ ءُ ملک  دیمروئی ءِ نیمگ ءَ جنزگ ءَ انت۔ مزن وزیر ءَ گوشت کہ معیشت گہتر بوھگ ءَ انت۔ ملک  گوں ترندی ءَ دیم ءَ جنزگ  ءَ انت۔   سستائیں توان ءِ در جنگ ءَ چہ آیوکیں باندات ءَ صنعتی ءُ لس ضلورت سرجم بنت ءُ صنعت  دیمروئی کناں ایشی ءَ چہ ملک ھم دیمروئی کنت۔ یات دارگ بہ بیت کہ داسو ڈیم فیز ون 2025 ءَ سرجم بوھان ءَ نیشنل گرڈ ءَ 2160 میگاواٹ ءِ پجاری بندات  کنت وھدیکہ 2029 ءَ فیز ٹو ءِ سرجمیں بوھگ ءَ چہ پد ڈیم ءِ کار رپک 4320 میگاواٹ بیت۔ مزن وزیر عمران خان  ءِ پاور سیکٹر گہتری ءُ ملکی آپ ءِ آسراتی ءَ را گہتر  کنگ ءِ ویژن ءِ  چیر دستی ءَ استیں دور ءِ حکومت ءَ داسو ڈیم ءِ سر ءَ کار ءِ گام آناں گیش اشتاپ کتگ۔ ڈیم ءِ جوڑیشت  ءِ واستہ زمین ءِ بھا زوری ءِ سر ءَ کار سرجم کنگ  بوتگ ءُ کورونا وائرس ءِ ھوپ ءَ ابید ایس او پیز آنی  پد  ءُ رند  کنان ءَ ڈیم ءِ جوڑیشت جاڑی انت۔