اسلام آباد۔ 17جون (اے پی پی) وزیرداخلہ شیخ رشید احمد پارینے کہ پاکستان نا نیمہ آبادی زالبول آتیا تالان ءِ، ساڑی حکومت اوفتے قومی دنگ اٹ اتنگ کن کوشست کننگ ءِ، پاکستان نا شونداری کن زالبول آتے ملکی زرگزران اٹ اوار کننگ المی ءِ، ساڑی آ بجٹ اٹ زالبول آتا راجی و زرگزرانی شونداری کن کیہی گام گیج سلاہ کننگانے، زالبول آتے کاروبار ءِ ودفنگ کن اولیتی وڑاٹ وام تننگ انگ ءِ۔ داخیال آتا درشانی ءِ او پنچ شنبے نادے آ اسلام آباد زالبول چیمبرز آف کامرس ناڈل اتون اوڑدہی ٹی گپ وتران کرساکرے۔ اوڑدہی ٹی زالبول آتے دارالحکومت اٹ کاروباری آسراتی فراوان کننگ نا بابت گپ وتران کننگاو اسلام آباد اٹی زالبول آتے کن جتا مارکیٹ جوڑ کننگ نابابت گپ وتران مس۔ وزیرداخلہ پارے کہ زالبول پاکستان نا نیمہ آبادی ءُ۔ اوفتے قومی دنگ اٹ اتنگ کن پالیسی جوڑ کرینن۔ پاکستان نا شونداری کن زالبول آتے ملکی زرگزران اٹ اوار کننگ المی ءِ۔ ساڑی آ بجٹ اٹ زالبول آتا راجی و زرگزرانی شونداری کن کیہی گام گیج سلاہ کننگانے۔ اوپارے کہ زالبول آتے کاروبار ءِ ودفنگ کن اولیتی وڑاٹ وام تننگ انگ ءِ۔ دارالحکومت اٹ زالبول آتے کن کاروباری وسیلہ غاتے ودفنگ نا بابت ہم گام گیج برجاءِ۔ اسلام آباد اٹی مارکیٹ زالبول آتے کن خاص ءُ مارکیٹ اس جوڑ کننگ اُن۔ اوپارے کہ مارکیٹ اٹ کاروباری اسٹال نا مالک آک بیرہ زالبول آک مریرہ۔ ہموزالبول آتے اولیت ایتنہ ہرافتے تون کاروباری وسیلہ محدود ءِ۔ زالبول چیمبرآف کامرس ءِ زالبول مارکیٹ اٹ شریداری ایتنہ۔ وزیرداخلہ پارے کہ نادرا و پاسپورٹ جوڑ کننگ نا سینٹر آتے ٹی زالبول آتے کن جتا ءُ ڈیسک اس جوڑ کینہ۔ داوخت آ چیمبر آف کامرس نا ڈل وزیرداخلہ شیخ رشید احمد نا منت واری ءِ ہرفے۔ ڈل انا نمائندگی ءِ اسلام آباد زالبول چیمبرنا صدر ثمینہ فضیل کرے۔
