اسلام آباد۔ 17جون (اے پی پی) اسپیکر قومی اسمبلی اسد قیصر پارینے کہ ایوان نا کارروائی ءِ جوانی اٹ چلیفنگ کن سیاسی جماعت آتا راہشون آتون رابطہ ٹی اُٹ، کنا برخلاف تحریک بے پتی اتنگ اپوزیشن نا کانودی حق ءِ، ایوان ءِ چلیفنگ حکومت و اپوزیشن نا اسیجائی زمواری ءِ، ای تینا سوغند نا خواست آتارداٹ ایوان ءِ چلیفیوہ، کنا استیفہ نا خواست اپوزیشن نا است خواہی مننگ کیک، ای ایوان آن ملوک آ مینڈیٹ نا رداٹ تینا زمواری تے سرترسا کیوہ۔ پنچ شنبے نادے آ پارلیمنٹ ہاؤس اٹی میڈیا نا نمائندہ غاتون غیررسمی گپ وتران کرسا اوپارے کہ منہ دے آن قومی اسمبلی ٹی مروک آ واقعہ غاک است ہسونی نا سوب ءُ، داوڑنا واقعہ غاک جمہوریت کن نیک بختی اس افس۔ کنا پورو کوشست مریک کہ ایوان نا کارروائی ءِ قاعدہ نا رداٹ چلیفنگے۔ اوپارے کہ حکومت و اپوزیشن ءِ اسہ پنہ غا اتنگ کن کوشست کننگ اٹی اُٹ۔ اوپارے کہ بجٹ دیوان اٹ باسک آک تینا حلقہ غاتا ہیت ءِ کیرہ ہنداخاطرآن داشرہ بھاز اہم مریک۔ اپوزیشن و حکومت ہڑتوم آتیان خواست ءِ کہ ایوان نا شرف نا خیال ءِ تخر۔ اسہ سوج اسے نا ورندی ٹی اوپارے کہ کنا برخلاف تحریک بے پتی اتنگ اپوزیشن نا کانودی حق ءِ۔ اپوزیشن تینا کانودی حق ءِ کاریم اٹ اتے ولے ایوان اٹ پارلیمانی روایت آتا خیال ءِ تخنگے۔ ایوان نا کارروائی ءِ چلیفنگ حکومت واپوزیشن ہڑتوم آتا اسیجائی زمواری ءِ۔ ای تینا سوغند نارداٹ ایوان نا کارروائی ءِ چلیفیوہ۔ اسہ سوج اسے نا ورندی ٹی اوپارے کہ کنا کس اسے تون ذاتی دشمنی اف ای مدام ایوان نا تقدس نا بحالی کن تیناکڑد ءِ اداکرینٹ۔ ای ایوان اٹ ہلڑبازی آ ایکشن ہلکٹ و باسک آتیا پابندی خلکوٹ۔ ہندن ءُ ٹرینڈ اس سیٹ کننگ خوانہ کہ بروک آ چینک داڑآعمل کیر و راہشونی دوئی کیر۔ اسہ پین سوج اسے نا ورندی ٹی اسپیکر پارے کہ ایوان نا کارروائی ءِ جوانی اٹ چلیفنگ کن سیاسی جماعت آتا پارلیمانی راہشون آتون رابطہ ٹی اُٹ اومیت کیوہ کہ ایوان نا کارروائی ءِ قاعدہ نا رداٹ چلیفنگک۔
