اسلام آباد۔ 17جون (اے پی پی) قومی احتساب بیورو(نیب) راولپنڈی جعلی اکاؤنٹ کیس اٹ 8کروڑ 14لکھ روپئی آن زیات زر انا چیک حکومت سندھ، سمٹ بینک و سندھ بینک انا نمائندہ غاتا حوالہ کرینے۔ ڈائریکٹر جنرل نیب راولپنڈی عرفان نعیم منگی پنچ شنبے نادے آ اسہ دود اسے ٹی داچیک آتے حکومت سندھ، سمٹ بینک و سندھ بینک انا نمائندہ غاتا حوالہ کرینے۔ روشن سندھ بینک پروگرام نا رداٹ سولر سٹریٹ لائٹ آتا خلنگ اٹ وڈی خوری نا مقدمہ ٹی 4.95ملین روپئی سندھ حکومت نا حوالہ کننگانے۔ اومنی گروپ نا کنڈآن سمٹ بینک آن درواٹ وام ہلک۔ اومنی گروپ نا بے پنی کمپنی پارک ویواسٹاک اینڈ کیپیٹل پرائیویٹ لمیٹڈ 37.5ملین روپئی ہلسا سمٹ بینک انا حوالہ کرے۔ حسین لوائی سندھ بینک انا ملازم آتااواری اٹ اومنی گروپ کن بے پنی وام دوئی کرے۔ اوڑآن 37.5ملین روپئی ریکور کرسا سندھ بینک ءِ پدی تننگا۔ نیب راولپنڈی جعلی بینک اکاؤنٹ کیس اٹ داتم اسکان 14وڈی خوری نا ریفرنس دائرکرینے۔ 13انویسٹی گیشن و 18انکوائری کننگانے۔ دوبہ دارآتیان جم وڑاٹ 33 ارب روپئی آن زیات نا زر دوئی کرسا قومی خزانہ ٹی جمع کرفنگانے۔ 20دوبہ دار پلی بارگین کرینو۔ نیب 69دوبہ دار آتا وارنٹ دزگیری جاری کرے۔ 57دوبہ دارآتے دزگیرکرے۔10دوبہ دار اشتہاری ءُ وخت اس کہ اِرادوبہ دارآک دزگیری آن مست پلی بارگین کریر۔ دامقدمہ غاتے ٹی 186دوبہ دار آتا پن ءِ ای سی ایل اٹ شاغنگانے۔ جعلی بینک اکاؤنٹس کیس انامرکزی دوبہ دارآتے ٹی مسکوہی صدر آصف علی زرداری، مسکوہی وزیر اعظم میاں محمد نواز شریف، مسکوہی وزیر اعظم سید یوسف رضا گیلانی، باسک صوبائی اسمبلی سندھ فریال تالپور، وزیر اعلیٰ سندھ سید مراد علی شاہ، مسکوہی وزیر اعلیٰ سندھ سید قائم علی شاہ، مسکوہی وزیر حوالکاری سندھ شرجیل انعام میمن، مسکوہی ڈپٹی چیئرمین سینیٹ سینیٹر سلیم مانڈوی والا، ڈائریکٹر اومنی گروپ خواجہ انور مجید، چیف ایگزیکٹواومنی گروپ عبدالغنی مجید، ڈائریکٹر اومنی گروپ خواجہ علی کمال مجید، ڈائریکٹر اومنی گروپ نمر مجید، مسکوہی صدر عارف حبیب گروپ حسین لوائی، مسکوہی صدر سندھ بینک بلال شیخ، مسکوہی ڈائریکٹر جنرل ایس بی سی اے منظور قادر کاکا خیل، مسکوہی سیکرٹری محکمہ خصوصی گام گیج سندھ اعجاز احمدخان، مسکوہی میٹرو پولیٹن کمشنر کے ایم سی متانت علی خان، مسکوہی میٹرو پولیٹن کمشنر کے ایم سی سمیع الدین صدیقی، مسکوہی ڈائریکٹر جنرل پارکس اینڈ ہارٹیکلچر نا ایم سی لیاقت علی خان قائمخانی ومسکوہی ایڈمنسٹریٹر نا ایم سی محمد حسین سید ئسک اوار ءُ۔ جعلی بینک اکاؤنٹ کیس اٹ داسہ ہم کیہی دوبہ دارآک زندان تیٹی ءُ۔داوخت آ گپ وتران کرساڈائریکٹر جنرل نیب راولپنڈی عرفان نعیم منگی پارے کہ چیئرمین نیب جسٹس جاوید اقبال نا کماشی ٹی ہروڑنا وڈی خوری نا چٹفنگ کن غٹ وسیلہ غاتے کاریم اٹ اتنگ انگ ءِ۔ داسہ دامتکن آ پاکستان اف۔ کانود نا رداٹ غٹ ءِ تینا کروک آتا ورندی ءِ تروئی مریک۔ ہربندغ و ادارہ ءِ تینا وس انا رداٹ بشخ شاغوئی مریک ولدا گڑا داملک شونداری نا کنڈآ کاہک۔ نیب راولپنڈی بے خوف و خلیس مگرمچھ آتا برخلاف کارروائی ءِ برجاتخک۔ اوالس آ زو رشاغاکہ او بھلوکٹیا سے نا لالچ اٹ غیرکانودی ہاؤسنگ سوسائٹی و اسکیم تیٹی زرکاری آن پاناد کیر۔
