حیدرآباد۔ 17جون (اے پی پی) ڈائریکٹر بینظیر انکم سپورٹ پروگرام شہید بے نظیر آباد ڈویژن محمد ہارون بہلکانی پارینے کہ احساس کفالت پروگرام نا رداٹ ڈویژن اٹ نیزگاری نا لکیر آن شیف زند ءِ تیرکروک آ اسہ لکھ آن زیات حقدار زالبول آتے ٹی بیرہ اسہ وار مالی امداد نا 12ہزار روپئی نا کمکی زرانا بشخنگ نا عمل بناکرینے، حقدار زالبول کمکی زر آتے ہرمسٹ آ ضلع غاتا انتظامیہ نا کنڈآن مقرر کروک 50احساس کفالت ہند آتیا ایچ بی ایل نا رجسٹرڈ ایجنٹ آتا کمک اٹ تینا ضلع غاتا خڑک انا سینٹرآن دوئی کننگ کیرہ۔ اوپارے کہ کمکی زرآتا فراوانی کن ضلعی انتظامیہ، محکمہ جان جوڑی و پولیس نا کمک ءِ دوئی کننگانے وخت اس کہ حقدار زالبول آتے کورونا غان بچفنگ نا ویکسی نیشن کن ہرمسٹ آ ضلع غاتے ٹی محکمہ جان جوڑی نا کنڈآن ویکسی نیشن نا عملہ مقرر کننگانے۔ محمدہارون پارے کہ کمکی زر آتا فراوانی ٹی ایس او پی تیا عملدرآمد کرفنگ آن بیدس غٹ کیمپ سائٹ آتیا بی آئی ایس پی احساس کفالت پروگرام نا چاروکی کن فیلڈ ٹیم تے مقرر کننگانے۔ ڈائریکٹر نا پاننگ ئس کہ حقدار زالبول آتا کمکاری زر آن ایچ بی ایل ایجنٹ اس کٹوتی کرے تو اونا برخلاف سخت کانودی کارروائی کننگک۔
