اسلام آباد۔ 17جون (اے پی پی) برطانیہ ٹی جی سیون ملک آتا سروکی کانفرنس نا وخت آ تحریک کشمیر برطانیہ مقبوضہ کشمیراٹی بھارتی فوج انا ظلم و کشمیری تا حق خودارادیت ءِ تالان کننگ کن مسہ دے ئی برانزی کیمپ اس اڈ تس و اقوام متحدہ نا کڑد، کشمیری تتون کروک آ قول آتے یات کرفنگا کہ کشمیری جہانی معاہدہ غاتیا عملدرآمد کن دنیاءِ وار اوار آ یات کرفنگ ءُ کہ اوفتے تون انصاف کننگے، درندہ صفت بھارتی کوزہ گیر فوج ءِ کشمیری آن کشنگے۔مچی کروک آک چندی بینرہرفیسر و خواست کریرہ کہ کشمیر ناویل ءِ پرامن ایسری کن جہانی برادری تینا کڑد ءِ ادا کے و بھارت ءِ بیوس کننگے کہ او تیناقول آتیا عمل کرفے، دنیا نا بھلا جہانی امن نا علمبردار ملک آک کشمیری تا کشت وخون بھارت نا دہشت گردی ءِ بند کرفر و کانفرنس اٹی بشخ ہلوک آتے چکار کرفسا کیر کہ مظلوم و محکوم قوم اتون انصاف کننگے۔ داوخت آ تحریک کشمیر برطانیہ نا صدر راجہ فہیم کیانی تران کرسا پارے کہ ڈیہہ ٹی مروک آ بے چیٹی نا اسل سوب کشمیر نا ویل ءِ، دنیا مستین اِرابھلا جنگ آتیان بھسکاری و بربادی نا ندارہ ءِ خنانے، کشمیر نا ویل ءِ مذاکرات و پرامن وڑاٹ ایسرکننگتو تو جنگی تصادم اسے نا نتیجہ ٹی جہانی امن ءِ بھاز خطرہ ءِ۔
