اسلام آباد۔ 16جون (اے پی پی) چیئرمین سینیٹ محمد صادق سنجرانی پارینے کہ بڑزکو ایوان حقی وڑاٹ ہاؤس آف فیڈریشن نا کڑد ءِ ادا کرسا پسماندہ و کم شون ہلوک علاقہ غاتے کن توار بڑزکرینے و شونداری عمل اٹ ترندی اتنگ کن صوبائی اکائی تے یکجا کننگ کن ہرلحاظ اٹ کوشست کننگ ءِ۔ چیئرمین سینیٹ داخیال آتا درشانی ءِ دیرانا راجی شخصیت رحیم شاہ نا کماشی ٹی جرگہ باسک آتیا تالان اسہ ڈل اسے تون پارلیمنٹ ہاؤس اٹی اوڑدہی ٹی کرے۔ ڈل چیئرمین سینیٹ ءِ ویل آتیان معلومدار کرے و پارے کہ چیئرمین سینیٹ نا کماشی ٹی بڑزکو ایوان نا کوشست آتیان مسکوہی فاٹانا ضلع و صوبائی زیر انتظامی قبائلی ضلع غاتا ویل آتے بھلو حداسکان ایسر مننگ اٹ کمک رسینگانے۔ ڈل چیئرمین سینیٹ نا جند انا کوشست آتا ستاءِ کرے و اونا منت واری ءِ ہرفے۔ جرگہ نا باسک آک چیئرمین سینیٹ ءِ دیراٹ ہائیکورٹ بنچ انا آسراتی فراوان کننگ نا بابت کانودجوڑکننگ، لینڈ سٹیلمنٹ نا ویل و N-40آن بیدس دیر اٹ براڈ بینڈ انٹرنیٹ نا آسراتی نا فراوانی نا بابت درخواست کریر۔ ڈل انا راہشون پارے کہ دا گڑاس ہندن ءُ ویل ءُ ہرافتے ایسر کننگ آن علاقہ پین شون ہلیک و السی خیرخواہی کن کاریم ءِ ترند کننگ مریک۔ چیئرمین سینیٹ پارے کہ داٹی ہچ ءُ شک اس اف کہ کم شون ہلوک علاقہ غاتے ٹی واپاری سرجزآتا مون آ دننگ بھاز المی ءِ۔ اوپارے کہ دیر و اوڑتون گنڈوک علاقہ غاتے ٹی سیل و سوات، کانڑکنی، زرکاری کن بھلو گنجائشت اس ساڑی ءِ و حکومت ہم داعلاقہ غاتیا چکار کننگ ءِ۔ اوپارے کہ زرکاری و واپاری سرجزآتے ٹی ترندی اتنگ کن غٹ آن بنداوی گڑاامن و ایمنی و سیکورٹی ءِ و داچرجوئی ٹی علاقہ نا سرکڑدہ غاتیا ہم بھلو زمواری اس مریک کہ او الس اٹ امن و ایمنی نا اہمیت نا بابت شعور تالان کیر تانکہ زرکارآک داعلاقہ غاتے ٹی زرکاری کن مون آ بریر۔ چیئرمین سینیٹ داوخت آ ڈل ءِ باوری کرفے کہ ہراویل آتا پیدواری ءِ کننگانے اوفتے کن تعلقدار محکمہ و فورم تتون رابطہ کننگک تانکہ الس کن آسانی ودی کننگ مرے۔ داوخت آ چیئرمین سینیٹ سی پیک نا ہم ذکر ءِ کرے وپارے کہ سی پیک پاکستان نا شونداری و شونہالی نا سوب مریک و بھاز المی ءِ کہ نن سی پیک نا ڈٹ آتا اہمیت ءِ پہہ مرین و شونداری نا عمل ءِ ترند تر کننگ اٹ تینا کڑد ءِ ادا کین۔ چیئرمین سینیٹ داوخت آداہم باوری کرفے کہ بڑزکوایوان نا چندی کمیٹی تا دیوان دیر اٹی اڈ ترفنگ کن سجفنگک تانکہ غٹ اسٹیک ہولڈر آتون سلابت آن پد ہندن ءُ پبی ءُ سلاہ و سوج مرتب کننگ مرے ہرافتا سوب آن اقتصادی و زرگزرانی شونداری نا کسر اٹ بروک آ اڑاند آتے مر کننگ مرے و ہراڑ ے گرج مرے ہموڑے کانود جوڑ کنننگ کن گام گیج کننگے۔ ڈل اٹی بشخ ہلوک آک چیئرمین سینیٹ نا خصوصی منت واری ءِ ہرفیر۔ داوخت آ چیئرمین سینیٹ ءِ دیر انا روایتی ٹوپی اس ہم بیرفنگا۔
