فیصل آباد۔ 16جون (اے پی پی) گورنر پنجاب چوہدری محمد سرور پارینے کہ مچ آ پنجاب اٹی آب پاک اتھارٹی نا چندی ڈٹ آتا رداٹ 5ارب روپئی نا خڑچ آن دسمبر نا ایسر اسکان 76لکھ مخلوق ءِ ساف کنوئی آ دیر فراوان کننگک وخت اس کہ داکان بیدس پین 76لکھ مخلوق ءِ سخی تا کمک اٹ ساف دیر فراوان کننگ نا پروگرام آ عمل برجاءِ و بروک آ سال اٹی ہم پنجاب اٹی یک و نیم کروڑ مخلوق ءِ کنوئی آ ساف دیر فراوان کننگک ہراڑکن مچ آ پنجاب اٹی 1538، واٹر فلٹریشن پلانٹ خلنگک ہرافتیان 525واٹر فلٹریشن پلانٹ آتا پی سی ون منظوری نا ریسہ غاتے ٹی ءِ نیز او کوشست کیک کہ بروک آ سال اٹی سیوریج سسٹم نا بابت ہم سوگو ڈٹ بندی کننگے تانکہ مخلوق ءِ خراب انگا دیر آن بچفنگ مرے۔ اوچارشنبے نادے آ سرکٹ ہاؤس اٹی فیصل آباد ڈویژن کن کنوئی آ ساف دیر انا ڈٹ آتا بنداو ءِ تخنگ نا دود آن پد پریس کانفرنس آن تران کریکہ۔ داوخت آ قومی اسمبلی نا قائمہ کمیٹی خزانہ و اقتصادی امور فیض اللہ کموکا، صوبائی وزیر دودوربیدگ وکالونیز میاں خیال احمدکاسترو، صوبائی وزیر وزیراعلیٰ معائنہ ٹیم محمد اجمل چیمہ، باسک صوبائی اسمبلی چیئرمین ایف ڈی اے چوہدری لطیف نذر و صوبائی پارلیمانی سیکرٹری لیبر شکیل شاہد و چیئرمین پنجاب آب پاک اتھارٹی ڈاکٹر شکیل ئسک ہم ساڑی ئسر۔اوپارے کہ فیصل آباد ڈویژن نا ہرچار آ ضلع غاتے ٹی اکتوبر نا ایسر اسکان 138واٹر فلٹریشن پلانٹ نا ڈٹ پورو مریک ہراڑآن لکھ آ مخلوق ءِ کنوئی آ ساف دیر دوئی مننگ کیک۔ اوپارے کہ الس ءِ ساف دیر انا فراوانی اونا مشن ءِ ہراڑکن او تدوک آ8سال آن ہروڑاٹ کوشست کننگ ءِ۔ اوپارے کہ مسکوہی حکومت آک ہم الس تون کنوئی آ ساف دیر انا قول کریسر ہراڑکن اوفک چندنی ڈٹ آتابناءِ ہم کریر ولے خراب گورننس و کرپشن نا سوب آن او ایسر اسکان سرمننگ کتور انتئے کہ ہراڈٹ انا بنداو ءِ بدنیتی آ تخنگے او اسل ایسر اسکان سرمننگ کپک۔ اوپارے کہ جنرل (ر) پرویز مشرف نا دور اٹی 20ارب روپئی نا خڑچ آن ساف دیر انا ڈٹ آتا کاریم نا بناءِ کننگا۔ اگہ دا زرانا اینو تون موازنہ ءِ کننگے تو او 100ارب روپئی نا بریبر مریرہ ولے بیوروکریسی نا اڑنگ آتا سوب آن او ڈٹ آتے ہم پورو کننگ متو۔ اوپارے کہ وزیراعظم، وزیراعلیٰ نا ویژن نا رداٹ پنجاب آب پاک اتھارٹی اس جوڑ کننگا و اونا بورڈ اٹ غیرسیاسی بندغ آتے اوار کننگانے تانکہ ہراکہ حکومت مرے داادارہ نا کاریم چرجوئی اٹ برجاسلے۔ حکومت آک بریرہ کارہ۔ ادارہ غاتے سوگو کننگے۔ اوپارے کہ مستین اٹ ریسکیو1122و اوورسیز کمیشن پنجاب نا ہندن ءُ ادارہ جوڑ کننگا ہرافتیا اینو مچ آ پنجاب نا مخلوق گمرکیک۔
