اسلام آباد۔ 16جون (اے پی پی) پاکستان تحریک انصاف نا قومی اسمبلی نا زالبول آک تدوک آ دے قومی اسمبلی ٹی مسلم لیگ (ن) نا باسک آتا کنڈآن پی ٹی آئی نا زالبول باسک آتیا جلہو آتا سخت انگا لوز آتے ٹی مذمت ءِ کرسا پارینو کہ مسلم لیگ (ن) نا کنڈآن زالبول باسک آتیا جلہو کننگا، خراب ءُ کرینگ تننگا و جلہو کننگا، داجماعت سیاسی ءُ جماعت اس سلتو، کوزہ گیر اس جوڑ مسنے، اوفتا اُراٹی ہم ایڑھ لمہ ارے، ننا مذہب و راج زالبول آتا شرف نا رغامک، پارلیمنٹ نا کارروائی ءِ چلیفنگ کن ضابطہ اخلاق اس مرتب کننگے، داچرجوئی ٹی اوفتے تون تولنگ کن تیار اُن۔ چارشنبے نادے آ پارلیمنٹ ہاؤس اٹی پریس کانفرنس آن تران کرسا موسمیاتی بدلی نا وزیر مملکت زرتاج گل وزیر پارے کہ تدوک آ مسہ سال آن مسلم لیگ (ن) نا ہندا وطیرہ مسنے کہ اوڑآن اسٹ اس ہم رکھ اف، اونا لیڈر نروک ءِ، داڑے ایڑھ و لمہ غاک عزت اٹ سیاست کننگ کن بریرہ، مدام سیاست اٹ دلیل اتون ہیت کننگک، مسلم لیگ (ن) نانرگلہ اسمبلی نا باسک آک زالبول آتے کرینگ ایترہ و خراب انگا زبان ءِ کاریم اٹ اتیرہ۔ اوسوج کرے کہ دافک اُراٹی ہم تینا زالبول آتون ہندازبان ءِ کاریم اٹ اتیرہ؟ ننے داقوم شرف تسنے و نن گچین مرسا ایوان آ سرمسونن۔ اوپارے کہ مسلم لیگ (ن) نا لیڈر مریم نواز کونسلر نا گچین کاری تیٹی ہم بشخ ہلنگ کپک، (ن) لیگ داسہ سیاسی ءُ جماعت اس سلتنے، دافک جلہو کرفرہ، ڈغارتیاکوزہ کیرہ، تدوک آ دے ایوان اٹ اوفک حدکریر کہ زالبول باسک آتیا جلہو کننگا و خراب انگا زبان ءِ کاریم اٹ اتسا اوفتا بے توقیری ءِ کننگا، ننا لیڈر عمران خان ننا ہیل تسنے کہ دلیل اٹ ہیت کننگے و عزت و شرف ءِ مدام مون آ تخنگے۔ اوپارے کہ اپوزیشن آن غریب دوست بجٹ سگنگ مفننگ ءِ، نن احساس کفالت پروگرام نا کمک اٹ غریب تپہ غاتا راجی آسراتی نا بست وبند ءِ کرینن۔ اوپارے کہ ن لیگ عدلیہ و زالبول آتیا جلہو کرفینے۔ اوپارے کہ مسلم لیگ (ن) نا باسک علی گوہر تدوک آدے ایوان اٹ بھاز گندہ ءُ زبان اس کاریم اٹ ایس و شہباز شریف اودے توتوہم۔ پارلیمانی سیکرٹری کانود و انصاف ملیکہ بخاری پارے کہ نن مظلومیت نا مقدمہ ءِ پیش کپننگ اُن، نن باوقار طرز سیاست آ یخین تخنہ، درونادے اسہ تہارءُ دے اس ئس، ننے اوڑآ ہچ ءُ حیرانگی اس مفک، اوفتا کنڈآن زالبول آتیا جلہو پوسکن ءُ ہیت اس اف، دااسہ تکلیف تروک ءُ عمل اسے۔ اوپارے کہ قاعدہ نا رداٹ پارلیمنٹ ءِ بایدے چلیفنگے، ننا پارلیمانی روایت آتے لتاڑنگا۔
