اسلام آباد۔ 16جون (اے پی پی) وزیر مملکت حوالکاری وشینکاری فرخ حبیب پارینے کہ الیکشن کمیشن اٹ پارٹی فنڈ آتا جانچ پڑتال کن درخواست آتا زوت فیصلہ ءِ کننگ کن درخواست دائر کرینن، سکروٹنی کمیٹی نا دیوان ہم متنے و نئے پیپلزپارٹی و ن لیگ ءِ پارٹی فنڈنگ جانچ پڑتال کن بٹنگا، اسٹیٹ بینک انا آخیریکو سماعت آ ہراریکارڈ ءِ پیش کرین اوٹی پک مسنے کہ ن لیگ و پیپلزپارٹی نا جمع کرفوک آ اکاؤنٹ آک جعلی ءُ، الیکشن کمیشن آئینی ءُ ادارہ اسے۔ اونا شرف ءِ کینہ ولے الیکشن کمیشن ایکٹ آف پارلیمنٹ نا رداٹ گچین کاری کرفنگ نا ءِ، الیکشن کمیشن تون اکاؤنٹ آتا جانچ پڑتال نا کیس چلینگ انگ ءِ، الیکشن کمیشن سکروٹنی کمیٹی اس جوڑ کرے ہرانا بے شمار دیوان مسنے، اسپیکر قومی اسمبلی آن خواست ءِ کہ اپوزیشن تون مروک آ معاہدہ ءِ میڈیا تون ہم شیئر کرسا کے انتئے کہ اپوزیشن معاہدہ کرسا سلپک۔ اوچارشنبے نادے آ الیکشن کمیشن نا پیشن میڈیا تون گپ وتران کریکہ۔ وزیر مملکت حوالکاری و شینکاری فرخ حبیب پارے کہ پارٹی فنڈنگ نا جانچ پڑتال نا کیس اٹ پیپلزپارٹی و ن لیگ بیدس شاہیں باہیں کننگ آن، ہچ ءُ ریکارڈ اس جمع کرفتنو، اوفتا پارٹی ٹی بروک آ پیسہ غاک ہراکان بسر، نواز شریف نا تاریخ ءِ دا اسامہ بن لادن آن پیسہ ہلسا کرے و منی لانڈرنگ ہم کرسا کرے، داکیس انا فیصلہ بایدے زوت مرے، روچہ مبارک آن مست سکروٹنی کمیٹی نا دیوان مس، سکروٹنی کمیٹی نئے ن لیگ ءِ بٹنگا و نئے پیپلزپارٹی ءِ بٹنگ انگا۔ اوپارے کہ ننا درخواست ءِ کہ سکروٹنی کمیٹی، چارٹر اکاؤنٹنٹس آتے تین تون تخسا جانچ پڑتال کے۔ اوپارے کہ الیکشن کمیشن نا سکروٹنی کمیٹی ن لیگ، پیپلزپارٹی و ننا کیس ءِ بِننگ ءِ، سپریم کورٹ نا ہم پیدوار پارت ءِ کہ غٹ جماعت آتا اکاؤنٹ آتا جانچ پڑتال ءِ کننگے۔ وزیر مملکت فرخ حبیب پارے کہ تدوک آ دے قومی اسمبلی ہراکانود جوڑ کننگ نا ایوان ءِ اودے پہلوان سازی و تن سازی نا جاگہ جوڑ کننگا، اخس ءُ شرم انا ہیت اسے کہ مچ آ سرکڑدہ داباندات نا کاٹم خواہی ءِ کننگ ءِ، اپوزیشن بنچ آتا کنڈآن اول گالم گلوچ کننگا ولدا ٹارگٹ کرسا ملیکہ بخاری آ جلہو کننگا، داوڑناتے زالبول آتا عزت و شرف نا خیال اف۔ اوپارے کہ مریم نواز شاہد خاقان عباسی ءِ پارت جاری کرے کہ ایوان اٹ ہلڑ بازی و جلہو کرفے، داپوسکن ءُ رویہ اس اف اوفتاتاریخ ءِ، اوفتا سرکڑدہ سپریم کورٹ آ جلہو، نیب آ خل خو تون اوار داوڑناکارروائی کرینو، شہباز شریف نا تقریر ءِ اگہ مریم صفدر گروپ خف توننگ خواتوکہ تو ایوان آن پیش تموسس، ہلڑبازی کپروسس۔ اوپارے کہ 20وار اپوزیشن تون رابطہ کرین ولے ہچ ءُ سنجیدہ ورندی اس ملیتو، وزیراعظم ءِ اولیکو دے تقریر کننگ نا موقع تننگ تو۔ اوپارے کہ پی ٹی آئی حکومت 110کانود قوممی اسمبلی آن پاس کرفینے، اوپارے کہ اسمبلی تیان ٹی اے ڈی اے، تنخواہ ہلیرہ ولے کانود جوڑ کننگ اٹ ہچ ءُ است خواہی اس اف، ہراتم کہ اپوزیشن تون معاہدہ مس تو اپوزیشن اودے پرغا، اسپیکر قومی اسمبلی آن خواست ءِ کہ اپوزیشن تون مروک آ معاہدہ ءِ میڈیا تون ہم شیئرکرسا کے انتئے کہ اپوزیشن معاہدہ کرسا سلپک۔ اسہ سوج اسے نا ورندی ٹی اوپارے کہ گچین کاری تے شفاف کننگ کن ٹیکنالوجی ءِ کاریم اٹ اتنگ والا اُن، دنیا نا چندی ملک آتے ٹی الیکٹرانک وونٹنگ نا نظام رائج ءِ۔
