کوئٹہ۔ 16جون (اے پی پی) وزیراعلیٰ بلوچستان جام کمال خان نا کماشی ٹی بروک آ مالی سال انا بجٹ 2021-22نا بابت میڈیا کیمپئن نا بابت دیوان اس اڈ ہلک۔ دیوان اٹی پارلیمانی سیکرٹری حوالکاری گودی بشریٰ رند، وزیراعلیٰ ناپرنسپل سیکرٹری زاہد سلیم، سیکرٹری حوالکاری سہیل الرحمان، اسپیشل سیکرٹری وزیراعلیٰ عابد سلیم قریشی، پروجیکٹ ڈائریکٹر سی ایم ڈی یو تون اوار ایلو تعلقدار کمامدارآک ساڑی ئسر۔ داوخت آ دیوان ءِ بجٹ 2021-22اٹ صوبہ نا شونداری و السی راجی آسراتی نا اوار ڈٹ آتے میڈیا و خاص وڑاٹ سوشل میڈیا غا تالان کننگ کن کروک آ گام گیج آتیا سرجم حوال تننگا۔ وزیراعلیٰ بلوچستان داوخت آ گپ وتران کرسا پارے کہ بجٹ ءِ جوان وڑاٹ الس نا مون آ اتنگ کن میڈیا نا کڑد بھازاہمیت تخک۔ وزیراعلیٰ بجٹ اٹ اوار راجی رکھ انا ڈٹ آتے حکومت بلوچستان نا سوشل میڈیااکاؤنٹ آتیا ڈیجیٹل پوسٹرو ویڈیوتا کمک اٹ نمان کننگ و حکومتی گام گیج و کارکڑد ءِ پبی وڑاٹ تالان کننگ نا پارت کرسا پارے کہ بجٹ نا بابت ٹویٹر اسپیس سیشن، خصوصی اشاعت و الیکٹرانک میڈیا غا پبی ءُ آگاہی مہم اس چلیفنگے۔
