سکھر۔ 15جون (اے پی پی) گھوٹکی ٹرین شکست نا انکوائری چارشنبے آن سکھر اٹ بناکیک، فیڈرل گورنمنٹ انسپکٹر آف ریلویز فرخ تیمور غلزئی مسہ دے اسکان بیان آتے قلم بند کیک۔ ترجمان ریلوائی سکھر نا رداٹ 7جون آ گھوٹکی نا خڑک اِرامسافر ٹرین ملت ایکسپریس و سرسید ایکسپریس نا نیام اٹ شکست مسوسس، شکست اٹ 63بندغ زوال کریسر۔ شکست نا انکوائری اینو 16جون آ سکھر اٹ بناکننگ ءِ۔ ترجمان ریلوائی نا رداٹ فیڈرل گورنمنٹ انسپکٹر آف ریلوائی فرخ تیمور غلزئی ملت ایکسپریس و سرسید ایکسپریس نا شکست نا بابت ڈویژنل سپرنٹنڈنٹ آفس سکھر اٹ 16جون آن مسہ دے اسکان انکوائری کیک، او 16، 17 و 18جون آ شکست نا بابت مسافر و گواہ تا بیان تے نوشتہ کیک۔ ترجمان پارے کہ اگہ کس اس ملت ایکسپریس و سرسید ایکسپریس نا ایکسیڈنٹ ڈی ریلمنٹ نا بابت شاہدی تننگ خواہک تو بڑزاتروک آ تاریخ آتے ٹی ڈویژنل سپرنٹنڈنٹ آفس سکھر اٹ ساڑی مرسا تننگ کیک یا دابابت حوال اس نوشتہ کرسا ہم 28جون 2021اسکان فیڈرل گورنمنٹ انسپکٹر آف ریلویز نا دفتر علامہ اقبال روڈ لاہور آ گدریفنگ مریک تانکہ شکست نا سوب و راستکی تسکان سرمننگ مرے۔ داکان بیدس ریلوائی ترجمان ڈہرکی ٹرین شکست نا حتمی رپورٹ ءِ شین تننگ اٹ مسٹ آن چار ہفتہ نا وخت درکار ءِ، حتمی رپورٹ آن پد زموارآتے سزا تننگک۔ ڈی ایس ریلوائی آفیس سکھر اینو16جون آن انکوائری نا بناءِ کننگ ءِ پک کرینے۔
