لاہور۔ 15جون (اے پی پی) صوبائی وزیر خزانہ مخدوم ہاشم جواں بخت پارینے کہ پنجاب حکومت نا پوسکن آ مالی سال انا بجٹ حقی وڑاٹ تحریک انصاف نا منشور نا رداٹ و السی است خواہی تا ترجمان ءِ ہراٹی نئے بیرہ حقی حساب وکتاب ءِ پیش کننگا بلکن مستین نا نمائشی ڈٹ آتا جاگہ غا ہیومن ڈویلپمنٹ آ چکار کننگانے، دنیا نا چاہندار آتا اومیت آتیان گچین پاکستانی زرگزران پرفارم کرے، پاکستان اکنامک سروے نا ساڑی آ رپورٹ نا رداٹ جی ڈی پی نا کچ اٹ ودکی نا کساس ءِ 3.94درسد خلنگا ہرا آئی ایم ایف و ورلڈ بینک انا کساس آتیان زیات ءُ ولے اومیت ءِ کہ دا کساس اینخو سال انا ایسر اسکان چار درسد آن بڑزاکاہک۔ بجٹ اٹ یونیورسل ہیلتھ انشورنس، تعلیم، پبلک ورکس و کشت وکشار ءِ اولیت تننگا، محکمہ پلاننگ اینڈ ڈویلپمنٹ تون اوار غٹ تعلقدار محکمہ غاتے سخت پارت کننگانے کہ او تینا محکمہ غاتا اسکیم تے تیارکرسا زوت آن زوت پیش کیر ہراڑکن جولائی اسکان سد ارب روپئی آن زیات فنڈ ریلیز کننگک تانکہ شونداری کاریم تا دمدستی بناءِ کننگ مرے۔ او سے شنبے نادے آ 90شاہراہ قائداعظم آ پوسٹ بجٹ پریس کانفرنس آن تران کریکہ۔ داوخت آ تعلقدار محکمہ غاتا سیکرٹری و ایلو بڑزکو کمامدارآک ہم ساڑی ئسر۔ صوبائی وزیر خزانہ پارے کہ تحریک انصاف نا حکومت چارمیکو و تاریخی بجٹ اس پیش کرے ہرا مثبت گروتھ والا بجٹ ءِ۔ اوپارے کہ تحریک انصاف نا سرکڑدہ مالی پالیسی تا اصلاح نا کسر ءِ اختیار کرے و وسیلہ غاتا گچین کاریم اٹ اتنگ آ چکارکرے، کوویڈ۔ 19اٹی پاکستان نا حکمت عملی مچ آ دنیا نا چکار نا وت جوڑ مس و حکومت نا کنڈآن مشکل حالیت آتے ٹی ارب آ روپئی نا پیکج تننگا و تعمیراتی پیکج تون اوار لکھ آ اُراتے، احساس پروگرام نا کمک اٹ سپورٹ تننگا، خولم نا امدادی نہاد ءِ ودفنگا، نت انا نہاد 860روپئی مقرر کننگا، کنوئی آ گڑا بورہ، خولم، تیل انا نہاد آتے مون آ تخسا افراط زر انا مون ءِ توننگا۔ اوپارے کہ مشکل زرگزرانی حالیت آتیان پد ہم صوبائی کٹیا تیٹی نمان گچینی بس و خراج ہلنگ تخوک آ ہدف آتیان بڑزا ہنا و ہنداسال صوبائی کٹیا تا تخوک آ ہدف 317ارب نا مقابلہ ٹی 359ارب روپئی یکجا کننگک۔ وخت اس کہ بروک آ سال انا ہدف 400ارب روپئی آن گدرینگک۔ اومستی پارے کہ پنجاب ریونیو اتھارٹی اینخو سال تینا تاریخ نا غٹ آن زیات خراج یکجاکرے۔ صوبائی وزیر خزانہ پارے کہ بروک آ مالی سال انا سالانہ شونداری پروگرام اٹ ڈسٹرکٹ ڈویلپمنٹ پروگرام پنجاب نا 36ضلع غاتے ٹی بلاتخصیص گرج انا رداٹ خذمت آتا فراوانی ءِ گچین کیک۔ اوپارے کہ بروک آبجٹ اٹ لاہور نا مرکزی اہمیت نا رداٹ شونداری ڈٹ آتے کن 28.3ارب روپئی نا زر جتا کننگ انگ ءِ ہرانا رداٹ لاہور شار اٹی انفراسٹرکچر نا میگا پروجیکٹ آتے پورو کننگک، شاراٹی اسہ ہزار کٹ آتیا تالان پوسکن انگا ہسپتال نا تفنگ نا بناءِ کننگ انگ ءِ۔ مخدوم ہاشم جواں بخت پارے کہ اینخو مالی سال اٹی ہرابیست ءُ پنچ آن زیات سروسز آ پنجاب نا خراج نا کچ ءِ 16درسد آن 5درسد کننگاسس اودے بروک آ مالی سال اٹی ہم برقرار تخنگک، داکچ بروک آ سال اٹی 10پین سروسز آتیا سیلز خراج ءِ 16درسد آن کم کرسا 5 درسد کننگ انگ ءِ۔ اوپارے کہ حکومت نا چکار پوسکنی اتنگ آٹے ہرانا سوب آن کٹیاتیٹی ودکی مریک۔ اسہ سوج اسے نا ورندی ٹی وزیر خزانہ پارے کہ بروک آ مالی سال انا شش تُو اٹی صوبہ نا سد درسد آبادی ءِ یونیورسل ہیلتھ انشورنس دوئی مریک وخت اس کہ صوبہ ٹی انصاف اپ گریڈیشن پروگرام نا رداٹ 8500آن زیات پرائمری اسکول آتے ایلیمنٹری نا درجہ تننگک۔
