اسلام آباد۔ 15جون (اے پی پی) بنجائی وزیر خزانہ و محصولات شوکت ترین تھرڈ پارٹی آڈٹ نظام نا بابت حکمت عملی ءِ زوت آن زوت عملی دروشم اس تننگ نا پارت کرساپارینے کہ داڑآن نئے بیرہ خراج آتا دنگ اٹ ودکی مریک بلکن محصولات آتے ٹی ہم خاطرخواہ ودکی ممکن مننگ کیک۔ داہیت ءِ او سے شنبے نادے آ داڑے ایف بی آر ہیڈکوارٹرنا دورہ ءِ کننگ نا وخت آ آفیسر آتون اوڑدہی ٹی گپ وتران کرسا پارے۔ اوڑدہی ٹی ایجنڈا ایف بی آر نا پوائنٹ آف سیل نظام تون ریٹیلر ءِ زوت آن زوت منسلک کرفنگ نا حکمت عملی ءِ وضع کننگ ءِ۔ داکان بیدس دیوان اٹی خراج آتا دنگ اٹ ودکی و دارداٹ پیش رفت نا جاچ ءِ ہلنگ ہم ئس۔ وزیراعظم نا خصوصی کمکار محصولات ڈاکٹر وقار مسعود و چیئرمین ایف بی آر عاصم احمد ئسک ہم داوخت آ ساڑی ئسر۔ چیئرمین ایف بی آر وزیرخزانہ ءِ پارے کہ آئی ٹی کمپنی تا پوائنٹ آف سیل نظام نا خلنگ و کنفیگریشن نا بابت لائسنسنگ نا عمل ءِ اگست نا ایسر اسکان پورو کننگک۔ غٹ آرٹی اوزاٹی چیف کمشنرآتا کماشی ٹی مانیٹرنگ سیل اس جوڑ کننگ انگ ءِ تانکہ او زوت آن زوت پی اوایس نظام تون منسلک مننگ نا رفتار و درکار نتیجہ غاتا براہ راست چاروکی ءِ کننگ کیر۔ وزیرخزانہ پی او ایس تون منسلک مشین تا ٹریکنگ پیش رفت نا چاروکی نا پارت کرے۔ اوپارے کہ مشین تا خلنگ آن پد ریٹیلرآتے ہروڑنا ممکنہ راہشونی فراوان کننگے۔ غٹ ریٹیلرآتا فروخت نا کچ انا تعین ءِ کننگے تانکہ پی اوایس نظام آن دوئی مروک آ درکار ریونیونا دوئی ممکن مننگ کے۔ وزیرخزانہ ایف بی آر اٹ پی او ایس نا بابت باندات آتے ترند کننگ کن جتا ءُ سیل اس جوڑ کننگ نا ہم پارت کرے۔ دیوان اٹی خراج نا دنگ اٹ ودکی نا حکمت عملی نا ہم جاچ ءِ ہلنگا۔ ایف بی آر نا ٹیم وزیرخزانہ ءِ پارے کہ بھلوکچ اسے ٹی ممکنہ خراج تروک آتا پیدوار ءِ کننگانے۔ دامعلومداری تھرڈ پارٹی آن دوئی کروک ودہولڈنگ معلومداری تا بنداو آ دوئی کننگانے، دافک خراج نیٹ اٹ اوار افس۔ چیئرمین ایف بی آر پارے کہ پیدوار مروک بندغ آتے خراج اٹ اوار کننگ انگ ءِ۔ وزیرخزانہ پارت کرے کہ تھرڈ پارٹی پک معلومداری تا بنداو آ پین ممکنہ خراج تروک آتے خراج نیٹ اٹ اتنگے و دارداٹ بروک آ اڑاند آتے مر کننگے۔ اوتھرڈ پارٹی آڈٹ کرفنگ نا بابت حکمت عملی ءِ زوت آن زوت حتمی دروشم اس تننگ نا ہم پارت کرے وپارے کہ داڑآن نئے بیرہ خراج اٹ ودکی بریک بلکن ریونیو ٹی ہم ودکی مریک۔ دیوان نا ایسر آ فیصلہ کننگاکہ ہڑتوم آ ایجنڈاآئٹم تیا عملدرآمد نا رفتار ءِ ہُننگ کن پین دیوان اڈتننگک۔
