اسلام آباد۔ 15جون (اے پی پی) چیئرمین سینیٹ محمد صادق سنجرانی پارینے کہ ساڑی آ دور اٹی جمہوری قدر انا مون آ دننگ کن پارلیمان نا کڑد بھاز اہم ءِ، پاکستان جمہوریت نا مون آ دننگ کن بے شمار قربانی تس، پوسکن آ دور اٹی بے شمار چیلنج مون تروک ءِ ہرافتے تون مون تننگ کن معلومداری و راستکی تیان آگاہی المی ءِ۔ داخیال آتا درشانی ءِ او سے شنبے نادے آ پوسکن گچین مروک آ سینیٹ نا باسک آتا قاعدہ و ضابطہ غان آگاہی و پارلیمانی امور نا بابت تربیت فراوان کننگ کن ادارہ پارلیمانی خذمت اٹی اڈ ہلوک آ ورکشاپ آن تران کرساکرے۔ چیئرمین سینیٹ پارے کہ پوسکن گچین مروک آ سینیٹ نا باسک آتے ادارہ پارلیمانی خذمت آن ہیلکاری عمل اٹ بخیر اٹ پاوہ۔ داوڑناہیلکاری پروگرام تا بھاز اہمیت ءِ، پوسکن آ سینیٹ نا باسک آک و کمیٹی تا چیئرمین تیکن داوڑنا ہیلکاری کورس انا اڈتننگ المی ءِ۔ اوپارے کہ ادارہ پارلیمانی خذمت اسہ یکتاءُ ادارہ اسے داڑآن کنے ہم ہیل کننگ نا موقع ملا، بھاز خواری و آزموندہ کار آفیسر آک پوسکن آ پارلیمنٹ نا باسک آتے ہروڑنا راہشونی فراوان کننگ کن تیار ءُ، داادارہ غان نیشنل انسٹی ٹیوٹ و مینجمنٹ نا وڑآ کورس درستی راستی کرفنگ ءِ، دابابت ایکٹ اٹ ترمیم ہم کننگک۔ اوپارے کہ ساڑی آ دوراٹی جمہوری قدر انا مون آ دننگ کن پارلیمان نا کڑد بھاز اہم ءِ، پاکستان جمہوریت ءِ مون آ دننگ کن بے شمار قربانی تس۔ پوسکن آدور اٹی بے شمار چیلنج مون تروک ءِ ہرافتے تون مون تننگ کن معلومداری و راستکی تیان آگاہی المی ءِ۔ چیئرمین سینیٹ پارے کہ ادارہ پارلیمانی خذمت پارلیمنٹرین و سرکاری آفیسر آتا تربیت کن اہم کڑد ادا کننگ ءِ، 21می صدی ٹی کاریم نا کچ ءِ گچین کرسا ویل آتا ایسر وخت انا بنداوی گرج ءِ۔ اوپارے کہ پارلیمنٹ سپریم ءُ ادارہ اسے و حکومت نا مرکزی مشینری نا حیثیت تخک، پارلیمنٹرین کن پوسکن آ دور انا رداٹ چیلنج آتون مون تننگ کن تعلقدار امورنا مہارت نا مننگ المی ءِ۔ پوسکن گچین مروک آ سینیٹ نا باسک آتے آگاہی فراوان کرسا کانود جوڑ کننگ و ایلو باندات آتے گچین کننگ اٹ کمک رسینگک۔ اوپارے کہ پارلیمنٹری خذمت آتے پین گچین کننگ کن مخصوص انتظامی کورس آتا بارواٹ آگاہی فراوان کننگک۔ ادارہ پارلیمانی خذمت آن پارلیمنٹرین ءِ راستکی تیا مبنی معلومداری و پٹ وپول فراوان کننگے تانکہ او گچین کانود جوڑ کننگ اٹ تینا کڑد ءِ ادا کننگ کیر۔ چیئرمین سینیٹ پارے کہ پوسکن گچین مروک آ باسک آتے کن گچین کانود جوڑ کننگ شرفمندی نا ہیت اسے ہراڑکن ننے سخت خواری نا گرج ءِ۔ اودااومیت نا درشانی ءِ کرے کہ داہیلکاری عمل آن پارلیمنٹرین موثر معلومداری دوئی کرسا سودمند کانود جوڑ کننگ نا کمک اٹ، ملکی شونداری و شونہالی ٹی تینا کڑد ءِ ادا کیرہ۔ ادارہ پارلیمانی خذمت پارلیمنٹرین کن تینا خذمت آتے گچین وڑاٹ پیش کرسا گچینی ودی کیک۔ داوخت آ ایگزیکٹیو ڈائریکٹر پپس محمد انور پارے کہ پارلیمانی امور کم و ود ہرہاؤس کن اسہ وڑ ءِ ولے دابابت پریکٹس جتا ءِ، داوڑناپروگرام تیکن چیئرمین سینیٹ مدام فعال کڑد ادا کرسا کرینے۔
