اسلام آباد۔ 14جون (اے پی پی) وزیراعظم عمران خان پارت کرینے کہ ٹارگیٹیڈ سبسڈی نا پوسکن آ نظام ءِ زوت گڈیکو دروشم اس تننگے، دانا سوب آن نزور تپہ غاتے المی آ گڑاتا ہلنگ اٹ مالی کمک فراوان کننگک، حکومت دابابت غٹ مالی وسیلہ فراوان کیک۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم عمران خان نا کماشی ٹی راج انا نزور تپہ غاتے حکومت نا کنڈآن سبسڈی فراوان کننگ نا بابت درستی راستی کرفوک آ پوسکن آ نظام آ حوال تننگا۔ دیوان اٹی وزیر خزانہ شوکت ترین، خصوصی کمکار ڈاکٹر ثانیہ نشتر، ڈاکٹر وقار مسعود، ڈاکٹر شہباز گل، صدر نیشنل بینک عارف عثمانی و تعلقدار آفیسر آک ساڑی ئسر۔ خصوصی کمکار راجی رکھ و تخفیف نیزگاری ڈاکٹر ثانیہ نشتر وزیراعظم ءِ ٹارگیٹیڈ سبسڈی نا فراوانی نا بابت سلاہ ئی نظام آ سرجم حوال تس۔ ڈاکٹر ثانیہ نشترپارے کہ احساس سروے ءِ نود ءُ دو درسد اسکان پورو کننگانے وخت اس کہ ہنداتُو انا ایسر اسکان داکاریم ءِ پورو کننگک۔ صدر نیشنل بینک نا کنڈآن حکومت نا تروک آ سبسڈی حقدار خاہوت آتے فراوان کننگ نا سلاہ ئی نظام آ حوال تننگا۔ دیوان ءِ پاننگاکہ ٹارگیٹیڈ سبسڈی نا نظام ءِ درستی راستی کرفنگ نا مسخت کروڑ آخاہوت ءِ المی آ گڑاتا ہلنگ اٹ مالی کمک فراوان کننگ ءِ۔ وزیراعظم ٹارگیٹیڈ سبسڈی نا بابت نظام اس شین تننگ آ تعلقدار آتا کوشست آتا ستاءِ کرسا پارے کہ حکومت نا کنڈآن ہزگارنیزگار ءِ اسہ وڑ سبسڈی فراوان کننگ نئے بیرہ سرکاری وسیلہ غاتا زیان ءِ بلکن داہمو غریب آتا حق تلفی مریک ہراداکمک نا حقدار ءُ۔ اوپارے کہ ٹارگیٹیڈ سبسڈی نا سوب آن نزور تپہ غاتے المی آ گڑاتا ہلنگ اٹ مالی کمک فراوان کننگک و دابابت حکومت غٹ مالی وسیلہ فراوان کننگ کن سنبرینگوک ءِ۔ وزیراعظم پارت کرے کہ پوسکن آ نظام ءِ زوت آن زوت گڈیکو دروشم اس تننگے تانکہ اونا بروک آ تُوآن بناءِ کننگ مرے۔
