اسلام آباد۔ 14جون (اے پی پی) وزیراعظم عمران خان پارینے کہ وخت آ ویکسین خلفنگ و ایس او پی تیا عملدرآمد آن کورونا دین انا مون ءِ توننگ مریک، الس نا منشاکارانہ وڑاٹ ویکسین خلفنگ ستاکڑزک ہرانا مٹ شون ہلوک ملک آتے ٹی ہم کم ملک، ہندوستان کون آ حالیت آتیان بچنگ کن ادارہ و الس ءِ اواری اٹ کورونا دین آن بچفنگ کن گام گیج آتے پک کروئی مریک۔ اوداخیال آتا درشانی ءِ دوشنبے نادے آ داڑے مچ آ ملک اٹی برجاکوروناویکسی نیشن مہم نا بابت بڑزکو کہول انا دیوان نا کماشی ءِ کرسا کرے۔ دیوان اٹی بنجائی وزیر داخلہ شیخ رشید احمد، بنجائی وزیر ڈٹ بندی و شونداری اسدعمر، بنجائی وزیر توانائی حماد اظہر، بنجائی وزیر ریلوائی اعظم خان سواتی، وزیراعظم نا خصوصی کمکار ڈاکٹر فیصل سلطان، محمد شہزاد ارباب و تعلقدار بڑزکو کمامدارآک بشخ ہلکر۔ دیوان ءِ نیشنل کمانڈ اینڈ آپریشن سینٹر نا کنڈآن ویکسی نیشن مہم نا ساڑی آ ٹک و آخبت نالائحہ عمل آ سرجم حوال تننگا۔ دیوان ءِ پاننگاکہ داوخت اسکان اسہ کروڑ آن زیات ءِ ویکسین خلنگانے ہراکہ کچ اٹنگا وخت اٹی اسہ اہم ءُ مزل اسے۔ داکان بیدس سرکاری، نیم سرکاری و نجی ادارہ غاک تینا 100 درسد ملازم آتے ویکسین نا فراوانی ءِ پک کننگ ءُ۔ داڑکن نئے بیرہ ساڑی آ ویکسین سینٹر آتا کچ ءِ ودفنگ انگ ءِ بلکن موبائل ویکسی نیشن ٹیم تا جوڑ کننگ ہم آخیریکو ریسہ غاتے ٹی ءِ۔ مستی پاننگاکہ وزارت تعلیم نا رداٹ سرکاری و غیرسرکاری ادارہ غاتا پنجا درسد آن زیات ملازم آتا ویکسی نیشن ءِ پورو کننگانے۔ ویکسی نیشن مہم نا بارواٹ آگاہی ودی کننگ کن نجی بشخ آتون اواری اٹ آگاہی مہم نا بناءِ ہم کننگانے ہرانا مثبت اثرالس نا بھلو کچ اسے ٹی منشاکارانہ وڑاٹ ویکسی نیشن کرفنگ نا دروشم اٹ دوئی مننگ ءِ۔ دیوان ءِ داہم پاننگاکہ ویکسی نیشن سینٹر آتا کچ ءِ اِراہنداخہ کننگ تون اوار اوار موبائل ٹیم تا کچ ءِ 48آن ودفسا 600کننگانے۔ داکان بیدس بھلو کچ اسے ٹی سرکاری و نجی ہسپتال آتے ویکسی نیشن سینٹرآتا لڑاٹ اوار کننگانے۔ پین گلگت بلتستان و آزاد جموں وکشمیراٹی سیل و سوات نا اہمیت ءِ مون آ تخسا خصوصی گام گیج کننگ انگ ءِ ہراٹی پترینگ انگ آ ویکسی نیشن سرٹیفکیٹ نا شڑت، آبادی والا علاقہ غاتے ٹی آبادی نا اولیتی بنداوتیا ویکسی نیشن نا پوروی پین پین اوار ءُ۔ وزیراعظم داوخت آ ویکسی نیشن کن کروک آ گام گیج آتے است جم گوندسا داہیت آ زور شاغاکہ وخت آ ویکسی نیشن و ایس او پی تیا عملدرآمد آن دادین انا مون ءِ توننگ مریک۔ وزیراعظم مستی پارے کہ پاکستان نا الس نا منشاکارانہ وڑاٹ ویکسین خلفنگ اسہ ستاکڑزوک ءُ گام اسے۔ ہرانا مٹ شون ہلوک ملک آتے ٹی ہم کم ملک۔ ہندوستان کون آ افسوزناک حالیت آتیان بچنگ کن ادارہ و الس ءِ اواری اٹ داڑآن بچفنگ کن گام گیج آتا نفاذ ءِ پک کننگ ناءِ۔
