لاہور۔ 14جون (اے پی پی) گورنر پنجاب چوہدری محمد سرور پارینے کہ نریندر مودی تینٹ بھارت نا غٹ آن بھلا دشمن جوڑ مسنے، اسرائیل و بھارت مظلوم آتون انتس کہ کننگ ءُ اوہم دہشت گردی اسے، وزیراعظم عمران خان اولیکو دے آن بھارت تون گچین تعلقداری تا خواہندار ءِ ولے گچین و پرامن تعلقداری کن کشمیرناویل ءِ ایسر کروئی مریک، پاکستان نا سفارتی کوشست آتا سوب آن اینو دنیا پاکستان نا موقف ءِ بِننگ ءِ و فلسطین نا ویل و کشمیر آ ہم ہیت مننگ ءِ، امریکہ تون اوار دنیا نا ہچ ءُ واک اس اوغانستان ءِ فتح کننگ کپک مذاکرات ہی ویل انا اسٹ انگا ایسر ءِ۔ او دوشنبے نادے آ نظریہ پاکستان ٹرسٹ لاہور اٹی ”کشمیرناویل، فلسطین نا ویل و ساڑی آ حالیت“ آتا سرحال آ اڈہلوک آ سیمینار آن تران و میڈیا تون گپ وتران کریکہ۔ داوخت آ مسکوہی ایم این اے مہناز رفیع، سمعیہ راحیل قاضی، سینئر صحافی سلمان غنی و مسکوہی چیئرمین پی سی بی خالد محمود تون اوار ایلوفک ہم ساڑی ئسر۔ گورنر پنجاب چوہدری محمد سرور پارے کہ دہشت گردآتا ہچ ءُ مذہب اس اف کینیڈاٹی پاکستانی خاہوت تون ہراظلم مسنے ہچ ءُ شک اس اف داہم دہشت گردی اسے و وخت بسنے دنیا اسلاموفوبیا نا برخلاف ہم ہندن ءُ گام گیج کے ہراوڑ دہشت گردی نا چٹفنگ کن کننگ ءِ دہشت گردی نا برخلاف پاکستان ہراقربانی تے تسنے دنیاٹی اونا ہچ ءُ درور اس ملیپک۔ اوپارے کہ دورہ امریکہ ٹی ای ہراکہ امریکی عہدیدارآتون ملانٹ ای غٹ آن مست کشمیر نا ویل و فلسطین نا ویل انا بابت راستکی تے اوفتا مون آ تخانٹ و اوغٹ آ زور شاغانٹ کہ دنیا ٹی امن نا کسر داویل آتا ایسری و ہموڑے برجاظلم انا چٹفنگ آن پیش تمک کنے خوشی ءِ کہ امریکی عہدیدارہم انسانی حق انا رکھ ءِ پک کننگ نا ہیت ءِ کننگ ءُ امریکہ عہدیدارآتیا پیدوار کرینٹ کہ اگہ کشمیرناویل و فلسطین ناویل ایسر مفک ہمووخت اسکان امن اسہ تغ اس سلک۔ اوپارے کہ وزیراعظم عمران خان اینو بیرہ کشمیری تا آخا فلسطینی الس نا ہم سفیر مرسا دنیاٹی اوفتا مقدمہ تون مون تننگ ءِ و مچ آ دنیاٹی ہراڑے کہ اوورسیز پاکستانی ارے اوہم کشمیری و فلسطینی تا سفیر ءُ اسرائیلی و بھارتی ظلم انا برخلاف دنیاٹی سکھ کمیونٹی ہم پاکستان نا موقف تون سلوک ءُ وامریکہ تون اوار دنیا ہم ہراڑے کہ پاکستان سیاست اٹ بشخ ہلیک ہموڑے پک وڑاٹ سکھ کمیونٹی ہم اوفتے تون اوار مریک و کس اس اوفتے شکست تننگ کپک۔
