اسلام آباد۔ 14جون (اے پی پی) وزیرخارجہ مخدوم شاہ محمود قریشی پارینے کہ پاکستان اوغانستان اٹی انٹرا اوغان امن عمل نا سرسہبی کن تینا کڑد ءِ برجاتخک، تزویراتی گہرائی نا نظریہ متروک مسنے،،ننا ہچ ءُ فریق اس فیوریٹ اف، تشدد و مفاہمت اوار اوار چلینگ کپسہ۔ پاکستان ءِ اوغانستان اٹی غٹ برائی تا زموار گوندنگ مفک۔ پرامن اوغانستان کن مخلص سرکڑدہ غاتا گرج ءِ۔ درملکی فوج انا پیش تمنگ اسکان ڈٹ اسسکان سرمتور تو اوغانستان اٹی انارکی تالان مریک۔ دوشنبے نادے آ ریجنل پیس انسٹیٹیوٹ نا کنڈآن، اسلام آباد اٹی اڈ ہلوک آ کانفرنس بعنوان پاکستان۔اوغانستان ہڑتوم آ کنڈآتا مذاکرات“ نا بنائی سیشن آن تران کرسا وزیر خارجہ اوغان نائب صدر و قومی سلامتی نا سلاہکار نا پاکستان نا برخلاف بیان تیا گڑتی نا درشانی ءِ کرسا پارینے کہ دوبہ خلنگ ہچ ءُ ویل اسے نا ایسر اف۔ پاکستان ءِ اوغانستان اٹ غٹ برائی تا زموار گوندنگ مفک۔ وزیرخارجہ پارے کہ وزارت خارجہ دوست و ہمسایہ ملک آتون تعلقداری تے ودفنگ کن کڑد ادا کیک۔ اوپارے کہ اوغانستان نا ویل سیاسی ءِ ہرا بیرہ مذاکرات اٹ ہی ایسر مننگ کیک۔ وزیرخارجہ مکہ مکرمہ ٹی پاک اوغان علماء نا دیوان آن پد اسیجائی اعلامیہ نا خیرمقدم ءِ کرے و پارے کہ شوریٰ علماء نا دیوان اٹی دہشت گردی نا مذمت ءِ کننگا۔ وزیرخارجہ پارے کہ پاکستان اسہ پرامن ءُ ملک اسے، دنیا نا نظریہ پاکستان نا بابت بدل مسنے۔ دنیا پاکستان ءِ اوغانستان اٹ امن نا کمکارنا وڑاٹ ہرک۔ شاہ محمود قریشی پارے کہ پرامن اوغانستان نئے بیرہ پاکستان بلکن مچ آ ڈیہہ نا فائدہ ٹی ءِ۔ اوغانستان نا ویل سیاسی نوعیت نا ءِ و نن جامع مذاکرات نا کمک اٹ سیاسی ایسری نا وکالت ءِ کننگ اُن۔ وزیرخارجہ اوغان سفیر نا داہیت آن امنا کرے کہ تشدد و مفاہمت اوار اوار چلینگ انگ کپسہ۔ قیام امن کن پرتشدد کارروائی تا توروئی مریک۔ وزیرخارجہ پارے کہ اوغان سلامتی نا سلاہکار نا ساڑی آ بیان آن کنے مایوسی مس، داوڑنا بیانک امن نا کوشست آتے لتاڑنگ کیرہ۔ دنیانا نظریہ پاکستان نا بابت بدل مسنے۔ دنیا پاکستان ءِ امن نا کوشست آتے ٹی کمکار نا وڑاٹ ہرک۔ اوپارے کہ پاکستان اوغان امن عمل اٹ تعمیری و مثبت کڑد ادا کرے۔ امریکی سینیٹر لنڈ سے گراہم پارے کہ نن اینو پاکستان ءِ ویل آتا بشخ آخا بلکن ویل آتا ایسر نا بشخ تکنہ۔ اوپارے کہ امن ہراسٹ نا است خواہی ءِ اینو نا اوغانستان بیست سال مست والا اف۔ اوپارے کہ ہراتم ای تینا پارلیمنٹ اٹ زالبول پارلیمنٹرین آتے متحرک خنیوہ تو کنے بھاز خوشی مریک۔ نن زالبول آتا کڑد ءِ گوجالنگ کپنہ۔ ای اسلامی ریاست نا نمائندہ نا وڑاٹ پاوہ کہ زالبول آتا کڑد بھاز اہم ءِ۔ وزیرخارجہ پارے کہ اوغانستان نا ساڑی آحالیت آتے ٹی، امن نا اسہ جوان ءُ موقع اس ساڑی ءِ اوغان سرکڑدہ غاتے داجوان انگا موقع غان فائدہ ہرفسا جامع سیاسی ایسر نا کسر اس آوار کروئی مریک۔ وزیراعظم عمران خان مدام اوغان ویل انا پرامن وڑاٹ ایسر کننگ نا ہیت ءِ کرینے۔ وزیراعظم عمران خان ءِ طالبان خان پاننگا ولے اینو دنیا ننا موقف نا ستاءِ کننگ ءِ۔ دوبہ خلنگ بھاز آسان ءِ ولے دااسہ فریق اسے نا فائدہ تننگ کپک۔ وزیرخارجہ پارے کہ ہراتم ہم کنا اوغان وزیرخارجہ حنیف آتمرتون اوڑدہی و گپ وتران مس ای اودے بھاز سنجیدہ و جوان خناٹ، داسہ وخت ءِ کہ نن دوبہ خلنگ آتیان پیشن پیش تمن۔ اوپارے کہ کناخڑک آ امن نا کسر نا بھلا اڑاند بے پتی ءِ، ننے مستین آن پیش تمسا مون آ ہنوئی مریک۔ اوغانستان اٹی امن آن پاکستان علاقائی رابطہ، کاسا 1000، تاپی پیپ لائن کون آ ڈٹ آتیان فائدہ ہرفنگ کیک۔ پاکستان نا مسخت اوغانستان اٹی امن ءِ۔وزیرخارجہ پارے کہ یورپ اِراجنگ عظیم خنا و اینو او یورپی یونین نا رداٹ اواری اٹ واپار کننگ ءِ۔ تدوک آ بیست سال اٹی اوغانستان اٹی کشت وخون ئس۔ نزوری آن انتس دوئی مس۔ درملکی انخلانا بابت وزیرخارجہ پارے کہ امریکہ فیصلہ کرینے کہ او تینا فوج ءِ 11ستمبراسکان اوغانستان آن کشک۔ 50درسد فوج داتم اسکان کشنگانے۔ داسہ حالیت آک پورو وڑاٹ بدل مننگ ءُ۔
