اسلام آباد۔ 14جون (اے پی پی) وزیر مملکت حوالکاری وشینکاری فرخ حبیب پارینے کہ وزیراعظم عمران خان نا سندھ انا 14پسماندہ انگا ضلع غاتا راجی و زرگزرانی شونداری کن 446ارب خڑچ انا پیکج اسہ ٹیکی اسے۔ بنجائی حکومت لس الس آ ودکی بھاریم شاغنگ آن بیدس کٹیاتا ہدف ءِ ودفینے، صوبائی شیئر 2704ارب آن ودسا 3412ارب مریک، داودکی 25درسد ءِ، پدریسہ مسٹ میکو وار خاص وڑاٹ تدوک آ دونیم سال اٹی پیپلزپارٹی سندھ اٹی ڈیلور کننگ اٹ بھاز بے وڑ بے سہب مس۔ کراچی تون اوار مچ آ سندھ انا الس پیپلزپارٹی نا کرپشن، لٹ و پل، جعلی اکاؤنٹ آتیان عاجز مسنو۔ دوشنبے نادے آ تینا بیان اٹی وزیر مملکت حوالکاری وشینکاری فرخ حبیب پارے کہ سندھ اٹی نیزگاری، ہلوک آ ناجوڑ ی تا غٹ تر ریکارڈ پنانے ولے بے حس سندھ حکومت ٹھس آن مس متو، داسہ الس اوفتا برخلاف بش مسنے۔ اوپارے کہ عمران خان سندھ اتون اوار مچ آ ملک انا وزیراعظم ءِ و اواسہ وڑشونداری نا خواہندار ءِ۔ وزیراعظم ملک انا غٹ اکائی تے اسہ وڑ وارخواہی فراوان کننگ کن حکومت نا عملی گام گیج کننگ ءِ۔ اوپارے کہ چندی علاقہ غاتے ٹی پرخ ءِ مر کننگ کن سویلی بلوچستان کن 20ارب، کراچی ٹرانسمیشن پلان کن 98ارب جتا کننگانے، گلگت بلتستان ڈویلپمنٹ کن 40ارب، سندھ انا 14ضلع غاتے کن 19.5ارب جتا کننگانے۔ اوپارے کہ وزیراعظم عمران خان نا سندھ انا 14پسماندہ انگا ضلع غاتا راجی و زرگزرانی شونداری کن 446ارب خڑچ انا پیکج اسہ ٹیکی اسے، سندھ انا دااولیتی ضلع غاتے ٹی بدین، حیدرآباد، لاڑکانہ، ٹنڈویار، دادو، جیکب آباد، میرپور خاص، ٹنڈومحمدخان، گھوٹکی، خیرپور، نوشہروفیروز، سانگھڑ، شکارپور و سکھر اوار ءُ، داڈٹ آتا پورو مننگ آن السی شونہالی نا پوسکن آ دور بناکیک۔
