سندھ حکومت الس ءِ آسراتی فراوانی نا بابت بے سہب مسنے، فواد چوہدری
سندھ حکومت اٹ داخس ہم لائخی اف کہ او امن ایمنی کن سندھ پولیس ءِ اپ گریڈ کننگ کے، مسلم لیگ (ن) اوورسیز پاکستانی تے وونٹ انا حق تننگ نا مخالفت ءِ کرے، بنجائی حوالکاری وزیر نا پریس کانفرنس
کراچی۔ 13جون (اے پی پی) بنجائی حوالکاری و شینکاری وزیر فواد چوہدری پارینے کہ سندھ حکومت الس ءِ بنداوی آسراتی تا فراوانی نا بابت بے سہب مسنے، ہر پنچ سال آن پد پیپلز پارٹی ربڑ سٹیمپ نا وڑ ءُ وزیراعلیٰ اس سی ایم ہاؤس اٹ تولفک، ہراڑتون فیصلہ کننگ نا ہچ ءُ واکداری اس مفک۔ اوڑتون فیصلہ کننگ نا واکداری مفک، کل واکداریک ہموفتتون ءُ ہرا سندھ اسمبلی ٹی آخا بلاول ہاؤس اٹی تولرہ۔ سندھ انا ضلع غاتے فنڈ جاری کننگ پننگ ءِ۔ زرداری خاہوت سندھ اسمبلی ءِ ژند کرینے۔ سندھ حکومت اٹ داخس ہم لائخی اف کہ او امن ایمنی کن سندھ پولیس ءِ اپ گریڈ کننگ کے، مسلم لیگ (ن) اوورسیز پاکستانی تے وونٹ انا حق تننگ نا مخالفت ءِ کرے، گچین کاری اصلاحات آتیان دافک نرنگ اٹی ءُ۔ (ن) لیگ نا بروک آ گچین کاری تیٹی ہچ ءُ آخبت اس اف۔ بروک آ ہفت سال اوفتا آخبت ہندا مرو کہ دافک بینر دوٹی اسہ کنج اسے ٹی سلوک مرور، ہراڑا لکھوک مرو کہ حکومت نامنظور، الیکشن نا منظور، دافتے داسہ خطاطی ہیل کروئی تمک کہ بینر لکھنگ کن اوفتا خڑچ و وخت بچنگ کے۔ پیپلز پارٹی نا دور اٹی ادارہ غاتے نیست و نابود کننگا۔ نن 60 آن زیات ادارہ نا سروک میرٹ آ ایسن، اینو ادارہ غاک تیان نت تیا سلنگ اٹی ءُ۔ دا ہیت آتے او یک شنبے نا دے پریس کانفرنس کرسا کرے۔ چوہدری فواد حسین پارے کہ نن صحافی تا ویل آتا ایسری نا پورو کوشست کرین، کل صحافی و ورکر آتے تروئی زرتس آتے پک کننگ کن صحافتی ادارہ غاتا سلوک آ پیسہ غاتے تسن۔ او پارے کہ پاکستان میڈیا ڈویلپمنٹ اتھارٹی جوڑ کننگ نا مسخت ہندادے کہ ہرا صحافی خاص وڑ اٹ الیکٹرانک میڈیا نا صحافی تون معاہدہ نا پاسداری مفننگ اٹی ءِ، تو اودے داڑا عملدرآمد کن کانودی حق رسینگ کے۔ او پارے کہ بجٹ اٹی کم آن کم پنداوڑی 20 ہزار روپئی پک کننگانے، کل صحافتی ادارہ غاتیا لازم ءِ کہ اوفک تینا کارندہ غاتا تنخواہ تیٹی ہندا نا رد اٹ ودکی کیر۔ بنجائی حوالکاری وزیر پارے کہ د اوخت آ کراچی ٹی بیدس ہمو علاقہ غاتیان ہراڑے ریکوری نا ویل ارے، لوڈ شیڈنگ مفننگ اٹی ءِ، کے الیکٹرک ءِ پنچ سد میگاواٹ ودکی بجلی فراوان کرین کہ کراچی نا شاریک باسنی ٹی خوار مفس، او پارے کہ کراچی نا شاری تے آسراتی فراوان کننگ کن حکومت خصوصی بست و بند کرے۔ چوہدری فواد حسین پارے کہ وزیراعلیٰ سندھ بدقسمتی اٹ قوم پرست سیاست کننگ اٹی ءِ، او ذوالفقار علی بھٹو شہید و بے نظیر بھٹو شہید نا سیاست آن تینے جتا کننگ اٹی ءِ، ہراڑان تعصب تالان مریک۔ او پارے کہ سندھ ءِ تدوک آ سال تیٹی کم و وَد 16، 18 ارب روپئی بنجا نا کنڈ آن رسینگار، صوبہ غاتے کن 27 درسد بجٹ اٹی بشخ تخنگانے، ہراڑان ہر چار آ صوبہ غاتا بشخ آن بنجائی حکومت نا شیئر اٹ ودک، دانا رد اٹ سندھ ءِ 700 ارب روپئی آن 750 ارب روپئی این ایف سی ایوارڈ رسینگک، وخت اس کہ ہنداخس پیسہ صوبائی حکومت تون بریک، تو سوج ودی مریک کہ دا پیسہ غاک ہرانگ کارہ؟ دا جاگہ نا حالیت دادے کہ 1990ء آن کراچی شار اٹی پولیس ءِ ترقی تننگتنے، کراچی پولیس نا حالیت ءِ خراب کننگ نا زموار سندھ حکومت ءِ، او پارے کہ بلوچستان نا بی ایریا تیٹی ہم حالیت داخس ہم خراب افس، ہراخس کہ دا وخت آ امن ایمنی نا بابت کراچی ٹی خراب ءُ۔ او پارے کہ بدین و گھوٹکی ٹی گیس و تیل انا رد اٹ رائلٹی نا وڑ اٹ سندھ حکومت پیسہ ہلنگ اٹی ءِ، اینو گھوٹکی و بدین نا حالیت ءِ ہُننگے، دا ضلع غاتا شونداری کن سندھ حکومت انت گام گیج کرینے؟
