پشاور۔ 13جون (اے پی پی) وزیر دفاع پرویز خٹک پارینے کہ ساڑی حکومت ملک ءِ مشکل آتیان کشسا مسٹ میکو بجٹ ءِ متوازن پیش کرے و دابجٹ حقی وڑاٹ الس دوست و خراج فری بجٹ ءِ، ہراڑآن اپوزیشن جماعت آتا دعویٰ تا پت پاش مسنے مولانا فضل الرحمان نواز شریف و آصف زرداری نا خاہوت آتا پلوک آ دولت ءِ بچفنگ پی ڈی ایم نا چھتری نا کیرغ آن داملک اتون انت اس کہ گوازی کننگ ءُ اوفتا دا ارمان اسل پورو مفک۔ وزیراعظم عمران خان حکومت تینا آئینی مد ءِ پورو کیک۔ ملک ءِ تنکی تیان کشنگ نا اسٹ انگا ایسر وزیراعظم عمران خان تون ءِ اپوزیشن منپننگ نا پالیسی ءِ ہلسا ملک انا فائدہ کن سیاست کے وزیراعظم عمران خان نا حکومت تینا پنچ میکو بجٹ ءِ پم پیش کیک و 2023ء ٹی کارکڑد نا بنداو آ الس آ کاہک اپوزیشن 2023ء نا گچین کاری تا تیار ی ءِ کے داسہ پی ڈی ایم نا ہم خیال جماعت آک اے این پی و پی پی پی الس ءِ اسلام،اِرغ، پچ، ہند پختون و قائد اعظم نا پن آ الس ءِ پین دھوکہ تننگ کپسہ۔ اومانکی شریف اٹی قیوم خان خٹک حجرہ، ایوب ٹھیکیدار حجرہ، خان زمان، غلام خان استقبالیہ و شمولیتی جلسہ غاتیان بطور مہمان خاص تران کریکہ، داوخت آ ایم این اے ڈاکٹر عمران خٹک، اے پی اے ابراہیم خٹک، اسحاق خان خٹک ئسک ہم تران کریر پرویز خٹک پارے کہ بدبختی اٹ پاکستانی قوم آسودہی و آسراتی تا خواست تو کیک ولے خراج نا زرتس اکن ہچ گہس تیار اف، وخراج آتا زرتفننگ نا سوب آن مچ آ ملک پیشن نا وام تیٹی اختہ مسنے مسکوہی حکومت آتا لٹ وپل کرپشن تینائی گری و ہیبدار اقتصادی پالیسی تا سوب آن پاکستان زرگزرانی و اقتصادی وڑاٹ نزور مسوسس جہانی زرکارآک زرکاری نا غرض اٹ پاکستان آ بننگ اسکان تیار الورہ پاکستان اٹی زرمبادلہ نا کوڑیک پنچ ارب ڈالر اسکان رہینگاسر و اسہ ملک اس ہم پاکستان تون واپار کن تیار الوکہ۔ اوپارے کہ مسکوہی حکمرانک نواز شریف، شہباز شریف تینا کارخانہ غاتے مون آ دننگ کن قومی خزانہ ءِ پلار زرداری کرپشن نا کمک اٹ جائیداد جوڑ کرے، عوامی نیشنل پارٹی ہم داصوبہ نا بھس کاری ٹی ہچ ءُ کسر اس ہلیتو و اوہم لٹ وپل، کرپشن و بہتی گنگاٹی دوتے سلسا کرے، داسہ مولانا فضل لرحمان اولیکو وار اقتدار آن پیشن مس تو ہنداخاطرآن اودے آرام بفننگ ءِ ہنداخاطرآن ہڑدے حکومت نا برخلاف پوسکن ءُ چم کننگ ءِ ولے اونا اسہ خواہش اس ہم پورو مننگ کتو۔
